Одбивањето на Израел да дозволи гориво да влезе во Појасот Газа ги загрозува животите на 130 предвремено родени бебиња во болниците во опколената енклава, соопштија локалните власти.

Министерството за здравство во Газа наведува дека „130 предвремено родени бебиња во Појасот Газа се изложени на ризик од смрт поради инсистирањето на израелската окупација да ја спречи испораката на гориво неопходно за работа на болничките генератори“.

Посочувајќи на недостигот на гориво, Министерството потсети на бројните потешкотии во работата на генераторите во регионот, кој е изложен на интензивни израелски напади околу две недели.

Недостигот на струја го отежнува користењето на медицинската опрема во болниците и го оневозможува лекувањето на болните и ранетите.

Портпаролот на израелската армија Авичај Адраи најави дека нема да дозволат гориво да влезе во Газа.

Газа се соочува со тешка хуманитарна криза, без струја, додека водата, храната, горивото и медицинските материјали се при крај.

Борбите започнаа кога Хамас започна повеќекратни ненадејни напади на 7 октомври, кои вклучија бројни ракетни напади и упади во Израел по копно, море и воздух.

Хамас рече дека рацијата била одмазда за претходните рации на џамијата Ал Акса и зголемувањето на насилството од страна на израелските доселеници.

Како одговор, израелската армија започна операција против цели на Хамас во Појасот Газа, која доби димензии на неселективно бомбардирање на цивилни објекти, станбени згради, џамии, цркви и болници.

Според податоците на палестинското Министерство за здравство, во израелските напади врз Појасот Газа загинале 4.385 лица, меѓу кои 1.756 деца и 1.000 жени.

Израелското Министерство за здравство во неделата објави дека бројот на починати во Израел е околу 1.400, а бројот на повредени е 5.132.