Вељко Пауновиќ официјално е нов селектор на српската фудбалска репрезентација.

Тој го наследи Драган Стојковиќ Пикси, кој поднесе оставка по поразот од Албанија во Лесковац (0:1).

Според соопштението од Фудбалскиот сојуз на Србија (ФСС), Пауновиќ ќе ја предводи репрезентацијата во борбата за квалификации за Светското првенство во 2026 година.

„Шансите за квалификација сè уште постојат, и затоа Вељко Пауновиќ, заедно со својот тренерски штаб, прифати да ја предводи репрезентацијата на натпреварите против Англија и Латвија“, соопшти ФСС.

Генералниот секретар на ФСС, Бранко Радујко, нагласи дека Пауновиќ ја прифатил поканата со максимална посветеност и желба да ѝ помогне на репрезентацијата во време кога сè уште постојат шанси за квалификација за Светското првенство.

„Вељко Пауновиќ од првиот ден покажа дека интересите на националната фудбалска репрезентација се над сè. Негов приоритет не беа договорот или финансиските услови, туку веднаш да се стави на располагање на Фудбалскиот сојуз на Србија и да го преземе тимот во толку важен момент. Тој нагласи дека сака целата своја енергија да ја насочи кон претстојните натпревари против Англија и Латвија, решен да се бори сè додека има и најмала шанса за успех“, рече Радујко.

Тој верува дека со неговото доаѓање ќе може да ги мотивира играчите и да ја подигне атмосферата во тимот, со цел да се обиде да ги сврти работите во корист на Србија.

„Нема да се откажеме сè додека има и последен процент на шанса. Резултатот од овие два натпревари во никој случај нема да влијае на статусот на Вељко Пауновиќ во иднина. Ќе продолжиме со дискусиите за неговиот долгорочен договор по завршувањето на овие натпревари, без оглед на нивниот исход“, рече Радујко.

Србија ќе игра против Англија во Лондон на 13 ноември, додека последниот квалификациски натпревар ќе го одиграат против Латвија во Лесковац на 16 ноември.

Поранешниот фудбалер на Партизан најголемиот дел од кариерата ја помина играјќи за тимови од Шпанија и Германија.

Најголем успех како тренер постигна во 2015 година, кога како главен тренер на младинската репрезентација ја освои титулата светски шампион со Србија на Мундијалот во Нов Зеланд.

Подоцна ги предводеше Чикаго Фајер, Рединг, Гвадалахара, Тигрес и Реал Овиедо.