Група експерти на ОН повикаа на целосна и независна истрага за злосторствата извршени во Израел и во Палестина.

Повикувајќи ги Израел, палестинската управа на Западниот брег и властите во Газа целосно да соработуваат со истрагите, тие рекоа дека „на независните истражители мора да им се дадат потребните ресурси, поддршка и пристап потребни за спроведување на брзи, темелни и непристрасни истраги за злосторствата наводно извршени од сите страни во конфликтот“.

„Должноста да се истражат воените злосторства и злосторствата против човештвото, вклучително и убиство по кратка постапка или вонсудско убивање, тортура или други навреди на човековото достоинство, е основна законска обврска“, додаваат тие.

Тие, исто така, ја повикаа меѓународната заедница да работи така што сите одговорни за воени злосторства и злосторства против човештвото, како и за какви било други меѓународни злосторства извршени во конфликтот, брзо да бидат изведени пред лицето на правдата, особено оние со командна одговорност.

„Не постои статут на застареност за таквите злосторства и тие спаѓаат под универзална јурисдикција, што значи дека судовите во која било земја можат да ги користат своите овластувања да ги гонат одговорните, без оглед на нивната националност и земјата каде што се извршени злосторствата“.

Израел започна масовна воена офанзива во Појасот Газа по прекуграничен напад на палестинската група Хамас на 7 октомври.

Оттогаш уби најмалку 14.854 Палестинци, вклучувајќи 6.150 деца и повеќе од 4.000 жени, според здравствените власти во енклавата.

Официјалниот израелски број на загинати изнесува 1.200.