Израелската армија во понеделник потврди дека фотографијата што кружи на социјалните мрежи, на која еден од нејзините војници во јужен Либан удира во статуа на Исус Христос, е автентична.
Признанието доаѓа по широкото негодување поради видеото на кое се прикажува војник како користи пневматски чекан за да ја скрши главата на статуа на Исус Христос во градот Деир Сирјан.
Израелската армија утврди дека во инцидентот е вклучен војник кој дејствува во јужен Либан.
Сквернавењето се случило и покрај инсистирањето на израелската армија дека „нема намера да ѝ наштети на цивилната инфраструктура, вклучително и верски објекти или религиозни симболи“.
Војската соопшти дека го гледа инцидентот „со голема сериозност“, објави новинската агенција ДПА.
Во соопштението на X, војската изјави дека однесувањето на војникот не било во согласност со вредностите што се очекуваат од нејзините сили.
Сепак, иако војската тврди дека инцидентот го истражува Северната команда, не даде детали за идентитетот на војникот или специфични дисциплински мерки.
Бес
Израелскиот премиер Бенјамин Нетанјаху остро го осуди вандализмот врз католичката верска икона.
Во објава на платформата X, Нетанјаху рече дека тој и „огромното мнозинство Израелци“ се „шокирани и тажни“ од инцидентот. Тој додаде дека надлежните воени власти спроведуваат кривична истрага и дека сторителот ќе биде „строго дисциплиниран“.
Тој, исто така, нагласи дека Израел „ја почитува слободата на вероисповед за сите“ и изрази жалење за инцидентот и за секој навреда што е предизвикана.
Поранешната конгресменка на САД, Марџори Тејлор Грин, остро ја критикуваше веста, доведувајќи го во прашање статусот на „нашиот најголем сојузник“ кој прима милијарди долари од даноци и оружје.
Рајан Грим, истакната американска медиумска личност, рече: „Израелските војници објавуваат слики од нивните воени злосторства и културно сквернавење две и пол години по ред без прекин“.
Познатиот коментатор на крајната десница и поранешен конгресмен Мет Гетц ја нарече израелската акција „ужасна“.
Либанските медиуми објавија штета на друго христијанско место во селото Аин Ебел во истиот округ. Во Либан речиси една третина од населението се хриситијани.
Извештаите покажуваат дека израелските напади погодиле голем број верски места во јужен Либан, вклучувајќи го и селото Шамаа во округот Тир.
Од 2 март, израелските напади врз Либан убија 2.294 луѓе и раселија повеќе од 1 милион.
Блокирање на влезот на патријархот
Минатиот месец, израелските сили му забранија на латинскиот патријарх од Ерусалим, кардиналот Пјербатиста Пицабала, да влезе во Црквата на Светиот Гроб за да ги води молитвите за Цветници, што е првото такво ограничување по векови.
Овој потег предизвика широки критики од глобалните лидери и религиозни институции во врска со слободата на богослужба.
Одлуката подоцна беше поништена по меѓународната реакција, при што израелските власти дозволија пристапот да продолжи, но епизодата ги истакна растечките тензии околу религиозниот пристап до светите места во Ерусалим и израелската блокада врз христијаните и муслиманите.
