Истанбулската општина Арнавуткјој организираше ифтарска програма во Општина Долнени во Северна Македонија.

На ифтарот со тема „Трпеза на братство од Арнавуткјој за Балканот“, на кој присуствуваа околу илјада граѓани, беше и претседателот на Собранието на Северна Македонија Африм Гаши, вицепремиерот Беким Сали, министерот за економија и труд Бесар Дурмиши, заменик-министерот за внатрешни работи Астрит Исени, турскиот амбасадор во Скопје Фатих Улусој, како и пратеници, политичари, бизнисмени и бројни гости.

Во своето обраќање, Гаши потсети дека неодамна бил гостин во Општина Арнавуткјој и дека со градоначалникот Мустафа Џандароглу разговарале за организирање заеднички ифтар. Тој ја нагласи важноста од средбата со граѓаните во Долнени, каде што вакви настани досега не биле организирани.

Градоначалникот на Општина Арнавуткој, Мустафа Џандароглу, во својот говор ги истакна духовните врски меѓу Балканот и Туркије.

„Причината зошто сме денес тука е показател за нашата историска одговорност. Ќе продолжиме да го одржуваме живо наследството на братството и правдата што сме го наследиле од нашите предци“, рече Џандароглу.

Градоначалникот на Општина Долнени, Блерим Ислами, нагласи дека на оваа ифтарска трпеза не се дели само храна, туку се зацврстува и голема пријателска врска. Тој информираше дека со посредство на претседателот на Собранието, Гаши, започната е иницијатива за збратимување меѓу општините Арнавуткјој и Долнени, што ќе биде основа за посилна соработка и солидарност.

Во рамки на програмата што Општина Арнавуткој ја реализира низ Балканот, целта е да се обезбеди ифтар за околу 16 илјади луѓе.