Американскиот претседател Доналд Трамп во неделата го повика Иран да се врати на преговарачката маса по ракетниот напад врз Израел, тврдејќи дека конечен договор би можел да биде постигнат во рок од неколку дена.

„Ги испаливте вашите ракети, тоа е доволно. Вратете се на преговарачката маса и постигнете договор“, изјави Трамп за Фокс Њуз (Fox News).

Американскиот претседател рече дека договор со Техеран би можел да биде потпишан „во понеделник, вторник или среда оваа недела“.

Иранскиот напад врз Хаифа и Назарет е прв напад на израелска територија од примирјето на 8 април и следуваше по израелскиот напад во Бејрут претходно во неделата.

Говорејќи за израелските напади во Либан, Трамп нагласи дека воените акции „не биле координирани со Соединетите Американски Држави“.

Тој рече дека „не е среќен“ поради нападот врз Хезболах во Бејрут.

Истакна дека во иранските напади нема повредени и дека се надева оти Израел нема да возврати, бидејќи одмаздничките напади „само ќе продолжат како во последните 47 години или последните 3.000 години“.

Трамп претходно изјави дека е „вознемирен“ од ставот на израелскиот премиер Бенјамин Нетанјаху за „постојаната борба“ со Либан.

Во обид да спречи понатамошна регионална ескалација, Трамп за Axios изјави дека „веднаш“ го повикува израелскиот премиер Бенјамин Нетанјаху за да му порача „да не го напаѓа“ Иран како одмазда.

Интервенцијата на американскиот претседател следуваше по првиот директен ирански ракетен напад врз Израел од стапувањето во сила на примирјето на почетокот на април.