Црна Гора со сегашната Влада има шанса да се движи кон подлабока европска и трансатлантска интеграција, а САД ја поддржуваат целта Црна Гора да стане членка на Европската унија, рече американскиот помошник државен секретар за европски и евроазиски прашања Џејмс О'Брајан, кој денеска е во официјална посета на Црна Гора.
О'Брајан во Подгорица се сретна со црногорскиот премиер Милојко Спајиќ, каде што разговараа за односите меѓу двете земји, економската соработка и интеграцијата на Црна Гора.
О'Брајан истакна дека Црна Гора е силен партнер на НАТО и дека е горд на тоа.
„Утрово се сретнав со врховниот и специјален државен обвинител. На средбите се уверив во посветеноста на Црна Гора на европскиот пат. Ние го поддржуваме патот на Црна Гора кон ЕУ. Овде не се работи само за инвестирање во Црна Гора, туку за Црна Гора да ја отвори вратата на поширок пазар“, рече О'Брајан.
Тој додаде дека со оваа Влада има шанса да се оди кон подлабоки европски и трансатлантски интеграции.
„Среќни сме што можеме да соработуваме со Црна Гора и што ја исполнува обврската да издвои два отсто од бруто домашниот производ (БДП) за одбрана“, рече О'Брајан.
Кога станува збор за ЕУ, додаде тој, се подготвува пакет за Црна Гора, кој треба да ги намали финансиските трошоци и да го забрза транспортот.
Премиерот на Црна Гора Милојко Спајиќ оцени дека посетата на помошникот државен секретар на САД за европски и евроазиски прашања покажува дека се исполнува една од целите на Владата - „Црна Гора да биде Сингапур на Европа“.
„И токму овој фокус на економијата беше присутен на денешниот состанок. Црна Гора без економија од 25 трилиони евра, како и американската економија, едноставно не може да оди напред и не може да ги постигне амбициозните цели што си ги поставивме. Ние во голема мера ги цениме нашите американски пријатели, кои навистина беа многу конструктивни во однос на црногорско-американскиот економски дијалог. Ова е само почеток“, рече Спајиќ на прес-конференцијата.
Тој посочи дека очекува големи резултати од дијалогот со американските компании и оти американската економија ќе биде многу позаинтересирана за црногорскиот пазар. Тој додаде дека Планот за раст на Западен Балкан, предложен од Европската Унија, е многу важен за Црна Гора, која го претвора мал црногорски пазар од половина милион луѓе во пазар од половина милијарда, а тоа го знаат многу добро и инвеститорите во САД.
Тој потсети дека Црна Гора има подготвено план од околу 90 реформи, со кои Црна Гора ќе се приближи до единствениот пазар на ЕУ, кој внимателно се следи во Вашингтон, како и кон европскиот пат на Црна Гора.
„Ги претставив и плановите за оваа година. Сакаме да имаме уште една меѓувладина конференција во Брисел, за време на белгиското претседателство, кога треба да ја отвориме можноста за затворање на поглавјата од преговорите оваа година. Ако се се случи според планираното, ние ќе бидеме рекордери за затворање поглавја“, рече Спајиќ.
