Унгарската влада одбила средба со американски сенатори во Будимпешта во врска со приемот на Шведска во НАТО, јавуваат медиумите.

Џин Шахин, демократска сенаторка за Њу Хемпшир и копретседавач на Сенатската набљудувачка група на НАТО, го изрази своето разочарување на прес-конференција во неделата поради потегот на Будимпешта.

Таа потсети дека Унгарија е последната членка на НАТО што не го ратификуваше членството на Шведска во алијансата.

„Разочарувачки е што ниту еден член на унгарската влада не ги прифатил поканите за средба со американската делегација“, рече сенаторката.

Американските сенатори претходно најавија дека ќе поднесат заедничка резолуција до американскиот Конгрес со која ќе се осуди наводното назадување на демократијата во Унгарија и ќе се повика владата на премиерот Виктор Орбан да ја укине блокадата на трансатлантската интеграција на Шведска.

Дел од делегацијата се и сенаторите Том Тилис и Крис Марфи.

Орбан, пак, претходно изјави дека парламентот ќе ја ратификува понудата на пролетната сесија.

Унгарија стана единствениот сојузник во НАТО кој допрва треба да го одобри членството на Шведска во алијансата, откако турскиот парламент ја ратификуваше апликацијата на оваа нордиска земја на 23 јануари.

За прием на нова членка потребна е едногласна поддршка од сите членки на НАТО.

Шведска и Финска аплицираа за членство во НАТО во мај 2022 година по почетокот на руската војна против Украина на почетокот на истата година.

Финска се приклучи на алијансата како нејзина 31-ва членка во април 2023 година.