Неодамнешниот напад на Израел врз Палестинците кои чекаат помош во храна во Газа е „неприфатлив“, изјави турскиот претседател Реџеп Таип Ердоган денес за време на средбата со Гурбангули Бердимухамедов, претседател на Народниот совет на Туркменистан.

„Ердоган на состанокот наведе дека нападот на Израел врз цивилите што чекаат помош во храна е неприфатлив и истакна дека Туркије и Туркменистан би можеле да соработуваат за да ја зголемат хуманитарната помош за регионот“, соопшти Директоратот за комуникации при турското претседателство на социјалната мрежа X.

Најмалку 112 Палестинци загинаа, а 760 се повредени кога израелските сили вчера гранатираа толпа што чекаше хуманитарна помош јужно од градот Газа, соопшти Министерството за здравство во енклавата.

Дирекцијата истакна дека Ердоган и Бердимухамедов, кој престојува во Туркије на Дипломатскиот форум во Анталија, одржале состанок на маргините на форумот.

„За време на состанокот се разговараше за билатералните односи меѓу Туркије и Туркменистан, како и за регионални и глобални прашања, вклучително и за систематските напади на Израел врз невини цивили“, се вели понатаму. Ердоган ја истакна важноста од интензивирање на напорите за преземање заеднички акции што би биле поволни за двете нации во различни домени, особено со цел да се зголеми обемот на билатералната трговија меѓу двете земји на 5 милијарди долари.

„Помеѓу Туркије и Туркменистан беа потпишани неколку договори, вклучително и Протоколот за меѓусебна соработка за развој на соработката на полето на природниот гас, изјавата за намера за соработка на полето на нафтата и природниот гас и Меморандумот за разбирање меѓу Туркменистан ерлајнс и Универзитет на Турската аеронаутичка асоцијација,“, додаваат од Дирекцијата.