Британската воена полиција уапси пет војници на Специјалната воздушна служба (САС) под сомнение за наводни воени злосторства во Сирија, објавија во вторникот медиумите.

Војниците од елитните сили би можеле да се соочат со обвиненија за убиство поради смртта на осомничениот милитант пред две години. Извештаите велат дека војниците употребиле прекумерна сила наместо да го уапсат мажот. Специјалците, пак, тврдат дека тој претставувал закана и имал намера да изврши самоубиствен напад.

Британски „Гардијан“ објави дека Министерството за одбрана соопшти дека нема директно да коментира за истрагата, но извори од одбраната посочија дека наводите за апсењата се точни.

„Го држиме нашиот персонал според највисоките стандарди и сите наводи за неправилност се сфаќаат сериозно. Каде што е соодветно, сите кривични пријави се упатуваат до официјалната полиција за истрага“, рече портпаролот на Министерството.

Според извештајот, САС е активно распоредена во Сирија во последните десет години и се занимава со борба против терористичката група ДАЕШ, поддржувајќи ги Сириските демократски сили, во кои доминира терористичката група ПКК/ЈПГ.

Ова не е прв извештај за наводни злосторства извршени од војници на САС, бидејќи во март минатата година беше покрената независна истрага за убиства „по кратка постапка“ од страна на британските сили во Авганистан.

Во декември 2022 година, британското Министерство за одбрана нареди независна истрага откако во документарец на ТВ Би-Би-Си се тврдеше дека војниците на САС убиле десетици луѓе за време на рациите извршени од една од нејзините тимови во провинцијата Хелманд во 2010-2011 година.