Министерството за здравство во Газа денес ја повика меѓународната заедница да ги спаси Палестинците во северниот дел на Појасот Газа од глад, нагласувајќи дека за израелската армија станало рутина да ги таргетира Палестинците кои чекаат помош, јавува Анадолу.

„Бомбардирањето толпа гладни луѓе станува секојдневна рутина што ја практикува (израелската) окупација, а меѓународната заедница ја гледа на телевизија“, се вели во соопштението на Министерството за здравство.

„Цената на мал пакет помош може да значи сигурна смрт“, рече и Министерството со седиште во Газа.

Пратија и повик за вознемиреност до меѓународната заедница барајќи да не дозволи палестинскиот народ во северниот дел на Појасот Газа „да биде жртва на глад, бомбардирање и болести“, предупредувајќи дека светот може да види најголем број жртви од глад во наредните денови.

Палестинската државна новинска агенција Вафа утринава цитираше здравствени извори во Газа кои рекоа дека најмалку деветмина Палестинци биле убиени од страна на израелската армија додека чекале да пристигне помош во подрачјето на кружниот тек Кувајт, југоисточниот дел на градот Газа.

Израел започна одмаздничка офанзива врз Газа по прекуграничниот напад на Хамас на 7 октомври. Во офанзивата загинаа повеќе од 31.100 Палестинци, а повредени се над 72.000.

Израел, исто така, воведе блокада на палестинската енклава, оставајќи го своето население, особено жителите на Северна Газа, на работ на гладување.

Според Обединетите нации, израелската војна принуди 85 отсто од населението на Газа на внатрешно раселување поради уништувачката блокада и недостигот на храна, чиста вода и лекови, а 60 отсто од инфраструктурата на енклавата се оштетени или уништени.

Израел е обвинет за геноцид пред Меѓународниот суд на правдата. Привремената пресуда во јануари му нареди на Тел Авив да ги запре геноцидните дејства и да преземе мерки за да се гарантира хуманитарна помош за цивилите во Газа.