Лидерот на Хамас во саботата изјави дека теренот и преговорите се две паралелни линии и дека има можност да се постигне договор ако владата на Нетанјаху „се откаже од тврдоглавоста“.

„Теренот и преговорите се две паралелни линии, при што движењето во преговорите се заснова на големината на издржливоста и сјајот на отпорот, стремејќи се со сета сила да стави крај на агресивната војна против нашиот народ“, рече Исмаил Ханије на Телеграм.

За постигнувањето договор со Израел, Ханије рече дека „можноста е достапна да се постигне договор во повеќе фази ако окупаторската влада се откаже од тврдоглавоста“.

Лидерот на Хамас понатаму додаде дека ставот на американскиот претседател Џо Бајден „се менува во реториката и е подложен на тестирање во спроведувањето“, додавајќи: „Од американската администрација се бара да преземе многу активности за да се запре политиката на геноцид и гладување нанесена врз нашиот народ во Газа и на северот“.

Во врска со ситуацијата на Западниот Брег, Ханије нагласи дека „е подложен на прогон со цел да се одвлече вниманието од поддршката на Газа и да се исцрпи стратешкиот резервоар кој го претставува проектот на отпорот и политичките константи на нашата кауза. Сепак, велам дека сето ова прогонство и репресија нема да успее, а ветровите тоа ќе го распрснат“.

Израел спроведува смртоносна воена офанзива на Појасот Газа од 7. октомври 2023, по прекуграничен напад на Хамас во кој беа убиени речиси 1.200 луѓе.

Најмалку 31.300 Палестинци, претежно жени и деца, оттогаш се убиени во Газа, а над 73.134 други се повредени поради масовното уништување и недостигот на неопходни работи.

Според палестинското Министерство за здравство, најмалку 27 лица починале од неухранетост и дехидрација во Газа како резултат на израелската блокада.

Израел е обвинет за геноцид пред Меѓународниот суд на правдата. Привремената пресуда во јануари му нареди на Тел Авив да ги запре геноцидните дејствија и да преземе мерки за да гарантира дека ќе се обезбеди хуманитарна помош за цивилите во Газа.