Најмалку 12 лица се приведени во врска со синоќешните нереди по фудбалскиот натпревар од турската Суперлига меѓу Трабзонспор и Фенербахче, изјави денес министерот за внатрешни работи на земјата Али Јерликаја.

Јерликаја на социјалната мрежа Х сподели дека луѓето биле приведени поради тепачка на теренот, откако Фенербахче го победи Трабзонспор со 3:2 на Папара Парк во Трабзон.

Тој додаде дека меѓу осомничените има и едно лице кое упаднало на теренот за да ги нападне играчите на Фенербахче, додека друго го отстранило знамето од корнер и се упатило кон играчите.

„Второосомничено е лицето кое го нападна хрватскиот голман на Фенербахче, Доминик Ливаковиќ“, додаде министерот.

Против осомничените се преземени правни дејствија и истрагата продолжува.

Додека играчите на гостинската екипа ја славеа победата во центарот на Папара Парк, десетици навивачи на Трабзонспор упаднаа на теренот за да ги нападнат. На местото на настанот пристигнале голем број безбедносни сили за да го спречат хаосот.

Видеоснимките што кружат на интернет покажуваат дека некои играчи на Фенербахче, како белгискиот напаѓач Миши Батшуаји, нигериското крило Брајт Осај-Самуел и холандскиот дефанзивец Џејден Остерволде се соочуваат со напаѓачите на теренот.

Нивниот соиграч Ливаковиќ бил удрен додека трчал кон тунелот.

За време на натпреварот, навивачите на Трабзонспор фрлаа факели и разни предмети на теренот, поради што натпреварот беше неколку пати паузиран.

Во трилер со пет гола, поранешниот играч од средниот ред на Манчестер Јунајтед, Фред, постигна два гола во 13. и 45. минута, додека Батшуаји го постигна победничкиот гол кон крајот на натпреварот.

Двата гола на Трабзонспор ги постигнаа Енис Барди во 63. минута и Трезеге (пенал) во 78. минута.

По победата второпласираниот Фенербахче го зголеми бројот на бодови на 79, додека Трабзонспор остана трет со 49 бодови. Галатасарај е прв во рангирањето со два бода повеќе од Фенербахче.