Канцеларот Олаф Шолц ги отфрли предлозите дека Германија треба да има свои нуклеарни боеви глави и да ја намали зависноста од американската заштита.
„На Германија не ѝ треба никакво сопствено нуклеарно оружје“, изјави Шолц денес, за време на панел-дискусијата, и нагласи дека НАТО останува камен-темелник на европската безбедност.
Одговарајќи на прашање на конференцијата „Европа 2024“, Шолц рече дека и покрај некои политички разлики меѓу САД и нивните европски партнери, трансатлантските врски остануваат силни и суштински.
„Можеби имаме геополитички различни проценки, но едно е сосема јасно, споделуваме вредности со демократијата и владеењето на правото. И тоа нѐ прави различни од другите“, рече тој.
„Се разбира, ние сме посилни во трансатлантската алијанса. Значи, нема никаква причина да се оспоруваат работите кои се толку вредни, а тоа е НАТО и трансатлантската соработка“, додаде тој.
Во текот на изминатите 8 месеци, неколку германски политичари сугерираа дека Германија треба да развие сопствен нуклеарен арсенал, заедно со нејзините партнери од ЕУ, и да ја намали зависноста од американската заштита.
Предлозите дојдоа откако поранешниот американски претседател Доналд Трамп ги критикуваше европските сојузници минатиот месец дека не го платиле нивниот фер удел во трошоците на НАТО и сигнализираше дека САД можат да ја преиспитаат својата нуклеарна заштита за Европа доколку бидат повторно избрани.
