Претседателот на Хрватска Зоран Милановиќ во средата изјави дека нема да го почитува предупредувањето на Уставниот суд, дека ги презира предупредувањата и дека ќе постапи како што му налага совеста.
Милановиќ го коментираше соопштението на уставните судии по неговата најава дека ќе се кандидира за премиерската позиција како кандидат на СДП на изборите во мај. Судиите го предупредија дека не смее да учествува во политички активности на ниту една политичка партија додека ја врши својата функција
„Со презир гледам на предупредувањата, не ми можат ништо, го кршат Уставот и претставуваат смртна опасност за хрватската демократија. Тоа нема да го почитувам и ќе го правам она што ми го кажува совеста, а тоа е да се грижам за функционирањето на системот“, рече Милановиќ по посетата на Факултетот за здравствени студии на Универзитетот во Риека.
„Образложението не може да биде дека не е во духот на Уставот, во либерална демократија тоа што не е забрането им е дозволено на граѓаните, а јас сум граѓанин“, додаде тој.
Милановиќ смета дека предупредувањето на Уставниот суд е целосно неосновано и наместо тоа требало да донесе одлука или решение, а за предупредувањето на Државната изборна комисија, која го повика да се воздржи од директно учество во кампањата на било која партија, рече дека тоа морало да биде напишано.
Хрватскиот претседател призна дека е безобразен и полн со гнев во коментарите за Уставниот суд и рече дека ќе продолжи да биде безобразен ако треба, но дека кажал сѐ.
„Колинда Грабар Китаровиќ за време на кампањата за претседател на Републиката додека беше претседател цело време посетуваше собири на ХДЗ „како Мила Гера“, „беше вегета во секое јадење на ХДЗ“, нека ми објаснат која е разликата“, рече тој.
„Што се однесува до мојот настап, јас сум претседател на Републиката и наскоро премиер“, рече тој и објасни дека ќе се воздржи да кажува дека ќе биде премиер, туку ќе вели дека наскоро ќе биде премиер. Тој вели дека не одлучил дали ќе учествува на европските избори.
Милановиќ повтори дека „доаѓаат реки на правдата, нови коњи и Трета република која ќе бара уставни измени од искуство “.
