Руските изборни власти денес официјално ги одобрија резултатите од претседателските избори 2024, прогласувајќи го актуелниот претседател Владимир Путин за победник, со доверба од 76,3 милиони луѓе.

Ела Памфилова, шефица на Централната изборна комисија (ЦИК), на прес-конференцијата во Москва рече дека во текот на тридневниот период на гласање од 15 до 17 март гласале повеќе од 87,5 милиони луѓе.

„Конечната излезност на претседателските избори во Руската Федерација изнесуваше 77,49 отсто. На изборите учествуваа вкупно 87.576.075 гласачи“, рече Памфилова, наведувајќи дека тоа не е забележано во модерната руска историја.

По пребројувањето на сите гласачки ливчиња, рускиот претседател Владимир Путин доби 87,28 отсто или речиси 76,3 милиони гласа, рече Памфилова.

Кандидатот на Комунистичката партија Николај Харитонов го зазеде второто место со 4,31 отсто од гласовите или повеќе од 3,7 милиони луѓе што гласаа за него.

Владислав Даванков, кандидатот на партијата Нов народ, доби 3,3 милиони гласа, што е 3,85 отсто од сите гласови.

Лидерот на Либерално-демократската партија на Русија, Леонид Слуцки, освои 3,2 отсто од гласовите, односно за него гласале речиси 2,8 милиони луѓе.

Според Памфилова, изборната кампања се одржала „квалитетно, со чисто пребројување на гласовите“.

Шефицата на изборното тело му се заблагодари на Министерството за надворешни работи за помошта за организирање на изборите во странство, велејќи дека дипломатската служба направила сѐ за да го обезбеди правото на глас на руските граѓани во другите земји.

Памфилова рече дека 388.791 лице гласале во 144 земји на 295 избирачки места за време на руските претседателски избори 2024 година.

Таа истакна дека Путин е прв дури и во земјите што се сметаат за „најнепријателски“ кон Русија.

„Во Германија, ако ги земеме сите избирачки места во целина, за Путин гласале 56,82 отсто од граѓаните, во Естонија 75,22 отсто, во Летонија 70,6 отсто, во Австралија 53,6 отсто, во Ерменија 54,7 отсто, во САД 42,23 отсто“, рече Памфилова.

Во организирањето на гласањето учествувале над милион луѓе, а само девет се суспендирани од должност со судски налог поради различни причини, рече Памфилова.

За време на изборниот процес починале двајца членови на локалната изборна комисија, од кои една жена што е убиена во украинскиот регион Запорожје кога нејзиниот автомобил наводно бил кренат во воздух од „украински саботери“ и еден маж што починал од срцев удар, рече Памфилова.

Таа истакна дека изборните власти примиле 14.389 приговори за потенцијални прекршувања при гласањето, од кои повеќе од половина биле „фалсификувани од странство“ за да се нарушат изборите и да се преоптовари системот за да не може да функционира правилно.

Три десеттини од гласачките кутии беа испрскани со зелена боја, а имаше и известувања за палење на избирачки места, наведе Памфилова.

Таа посочи дека најголем број неважечки ливчиња дошле од Полска и земјите во кои се преселиле руските државјани по почетокот на „специјалната воена операција во Украина“.

Централната изборна комисија едногласно ги потврди резултатите од гласањето, ги прогласи за валидни и официјално го прогласи Владимир Путин за победник.

Според руското законодавство, инаугурацијата на шефот на државата треба да се одржи на 7 мај. Путин ќе остане на функцијата до мај 2030 година.