Хамас објави дека инсистирањето на израелскиот премиер Бенјамин Нетанјаху за копнен напад врз градот Рафа на јужниот дел на Појасот Газа претставува отворен пркос на сите меѓународни предупредувања.

„Нетанјаху продолжува да користи верска реторика за постигнување политички цели, што дополнително ја поттикнува разорната војна против нашиот народ во Појасот Газа“, велат од Хамас.

Во соопштението се наведува дека Нетанјаху отворено им пркоси на сите меѓународни предупредувања.

„Намерата на Нетанјаху да изврши злосторство во Рафах ги оспорува сите меѓународни позиции што предупредуваат за каква било воена операција во градот“, се додава.

Нетанјаху вчера изјави дека израелската армија ќе влезе во Рафах и ќе оствари победа.

Исто така, во соопштението од Кабинетот на израелскиот премиер на 15 март беше објавено дека Нетанјаху го одобрил планот за евентуална воена операција јужно од Рафах.

Најмалку 32.226 Палестинци се убиени во израелските напади врз Појасот Газа од октомври, соопшти во неделата Министерството за здравство во опколената енклава.

Израел започна напади врз Појасот Газа по прекуграничниот напад на Хамас, во кој Тел Авив вели дека загинале речиси 1.200 луѓе.

Според Обединетите нации, војната принуди 85 отсто од населението на Газа на внатрешно раселување поради акутен недостиг на храна, чиста вода и лекови, а поголем дел од инфраструктурата на енклавата е оштетен или уништен.

Израел е обвинет за геноцид пред Меѓународниот суд на правдата, кој со привремената одлука во јануари му нареди на Тел Авив да ги запре геноцидните дејства и да преземе мерки за да гарантира хуманитарна помош за цивилите во Газа.

Непријателствата и понатаму продолжуваат со ненамалено темпо, а испораките на помош се недоволни за справување со хуманитарната катастрофа.