Германија ќе врши гранична контрола на сите свои граници за време на Европското фудбалско првенство во јуни и јули оваа година, изјави министерката за внатрешни работи на земјата, Ненси Фаесер.

Фаесер за весникот „Рајнише пост“ изјави дека за време на европското првенство ќе се вршат проверки на сите германски граници за да се спречи влез на можни насилни криминални групи.

Таа додаде дека ова е неопходно за поголема безбедност на овој голем меѓународен настан.

Како што рече Назер, фокусот на владата е на заштита од екстремисти, хулигани и други и сајбер напади.

Нејзините изјави уследија по вооружениот напад во околината на Москва, за кој одговорноста ја презеде терористичката организација ДАЕШ. Во нападот загинаа 137 луѓе, а повеќе од 180 беа ранети откако вооружени напаѓачи отворија оган во петокот кога рок-бендот „Пикник“ требаше да настапи во концертната сала „Крокус Сити Хол“ во московскиот регион.

Сепак, одлуката за повторно воспоставување на гранични контроли за време на фудбалскиот турнир беше долгоочекувана. Ова стана стандардна практика за земјите од Шенген за време на големи спортски настани и големи самити.

Германија веќе спроведува контроли на нејзините источни и јужни граници со Полска, Чешка, Австрија и Швајцарија поради опасност од мигранти.

Европското првенство започнува на 14 јуни, а домаќинот Германија игра против Шкотска на воведниот натпревар во Минхен. Финалето ќе се игра во Берлин на 14 јули.