Дали нашите кучиња можат да ги разберат зборовите што ги користиме? Една нова студија за мозочните бранови, објавена во списанието Current Biology, сугерира дека слушањето на имињата на нивните омилени играчки ја активира меморијата за предметите со кои се поврзани.

„Ова ни покажува дека тоа не е само човечка способност“, изјави за АФП авторката на истражувањето Лила Маѓари од универзитетот Лоранд-Еотвош во Унгарија.

Прашањето дали кучињата ги разбираат зборовите или ситуациите, како што се употребениот тон или одреден контекст долго време е нерешено и науката не можеше да даде јасни одговори.

Во минатото, неколку лабораториски тестови покажаа дека кучињата, со мали исклучоци, не можат да донесат предмети откако ќе ги слушнат нивните имиња.

Многу експерти тврдат дека не е она што им го кажуваме што ги мотивира, туку како и кога го правиме тоа.

На пример, кога сопственикот му вика на кучето "донеси го стапот!" а кучето го зема не докажува дека знае што значи зборот „стап“.

Мозочни бранови

За оваа нова студија, Лила Маџари и нејзините колеги користеле неинвазивна техника за снимање на мозокот на 18 кучиња. Со помош на електроди поставени на нивните черепи, тие ја снимиле мозочната активност.

Нивните сопственици ги кажувале зборовите за играчките што им биле најпознати, а потоа им го покажале или соодветниот предмет или друг предмет. По анализата на снимките од ЕЕГ, тимот открил различни мозочни обрасци кога на кучињата им биле прикажани соодветни предмети или други предмети.

Овој тип на експеримент, кој со децении се користи врз луѓето, се смета за доказ за разбирање на значењето и исто така ја има предноста што не бара кучето да го врати предметот за да го докаже своето знаење.

„Го откривме овој ефект кај 14 кучиња докажувајќи дека способноста не е ограничена на „неколку исклучителни кучиња“, изјави за АФП коавторот на студијата Маријана Борош, додавајќи дека „дури и четирите кучиња што „не успеале“ на тестот, можеби едноставно биле тестирани на погрешни зборови“.

„Способноста на кучињата да донесат одредена играчка откако ќе го слушнат нејзиното име се сметаше за дарба“, изјави за Асошиетед прес Холи Рут-Гутериџ, бихејвиорист на кучиња од Универзитетот Линколн во Англија.

Реакција на мозокот

„На пример, познатите кучиња од расат „бордер коли“ Чејзер и Рико можеа да пронајдат и да извлечат одредени играчки од големи купови, но тие се сметаа за исклучоци, но новата студија покажува дека цела низа кучиња ги учат имињата на предметите во смисла на реакција на мозокот, дури и ако тое не се покажуваат преку однесување, рече Рут-Гутериџ.

Когнитивниот научник од Универзитетот Сан Диего, Федерико Росано, истакнува дека студијата „обезбедува дополнителни докази дека кучињата можат многу подобро да ги разберат човечките гласови отколку што вообичаено им даваме заслуга“.

Сепак, не сите експерти беа подеднакво ентузијасти. Клајв Вин, бихејвиорист за кучиња на Државниот универзитет во Аризона, изјави за АФП дека е „поделен“ за резултатите.

„Статијата не држи вода кога се обидува да го демонстрира она што го нарекува семантичко разбирање“, рече тој, пофалувајќи го генијалниот експериментален уред што овозможува да се тестира целиот „функционален речник“ на кучињата.

На пример, Вин рече дека мора да го диктира зборот „прошетка“ наместо да го каже за неговото куче да не се возбудува очекувајќи да излезе надвор.

„Нема потреба да се преземаат такви мерки на претпазливост со луѓе чие разбирање на зборовите оди подалеку од едноставна асоцијација. Дали Павлов би бил изненаден од овие резултати?“, прашува Вин, мислејќи на познатиот руски научник, познат по „Павловиот рефлекс“, кој покажал дека на кучињата може да им потечат лиги секогаш кога ќе го слушнат звукот на ѕвончето кое сигнализира за време на оброкот: „Мислам дека не“, заклучува Вин.