Антитуристичките движења се множат во Шпанија, медитеранска земја која минатата година ја посетија 85 милиони туристи, па властите се обидуваат да ги усогласат интересите на локалното население и профитабилниот сектор.

Собирајќи се под слоганот „Канарските острови имаат лимит“, група демонстранти на шпанскиот архипелаг во близина на северозападниот брег на Африка подготвуваат серија протести за сабота.

„Нашите острови се богатства што мораме да ги браниме“, рече портпаролот на протестите Виктор Мартин за време на брифингот со новинарите.

Канарските острови се познати по своите вулкански пејзажи и сончевата светлина во текот на целата година, па привлекуваат милиони посетители од целиот свет. Минатата година примија 16 милиони гости, што е драстично повеќе од локалното население од 2,2 милиони.

„Ова е неодржливо ниво со оглед на ограничените ресурси на архипелагот“, рече Мартин. Тоа е самоубиствен модел на економски раст“, ​​додаде тој.

Тој и неговите истомисленици бараат властите да ја прекинат работата на два нови хотели на Тенерифе, најголемиот и најразвиениот од седумте острови на архипелагот.

Тие, исто така, повикуваат на локалните жители да им се дадат поголеми права на глас со оглед на, како што го гледаат, неконтролираниот развој што ѝ штети на животната средина. Неколку членови на колективот „Распродадени Канарски острови“ минатата недела започнаа штрајк со глад за да извршат притисок врз властите.

Слични антитуристички движења се појавија и на други места во Шпанија и се активни на социјалните мрежи.

Во јужното пристаниште Малага, покрај песочниот брег на Коста дел Сол, на ѕидовите се појавија налепници и графити на кои пишуваше „Ова беше мојот дом порано“ и „Одете си дома“.

Активисти во Барселона и на Балеарските Острови поставија лажни знаци на влезовите на некои популарни плажи со предупредување на англиски за ризикот од „паѓање карпи“ или „опасни медузи“.

Локалните жители се жалат дека поради порастот на сместувањето на платформите за краткорочно изнајмување, како што е Airbnb, им недостасува станбен простор. Посочуваат дека кириите им се покачени, особено во градовите. Приливот на туристи ја зголемува и бучавата и ја загадува животната средина.

Во североисточниот регион на Каталонија, кој во февруари прогласи вонредна состојба поради сушата, расте гневот поради недостигот на вода. Тамошните хотели на Коста Брава се обидуваат да се изборат за исцрпените резерви на вода.

„Има туристички дестинации кои се на лимитот на нивниот капацитет“, рече Хозе Луис Зореда, потпретседател на здружението на туристичките агенции „Екселтур“.

„Тоа е проблем што повремено се појавува во екот на сезоната и во одредени делови од земјата, но сега се влошува“, додаде тој.

Протестните движења против прекумерниот туризам се појавија во Шпанија, особено во Барселона и пред пандемијата на коронавирус да ја фрли глобалната туристичка индустрија на колена во 2020 година.

Сега, кога ограничувањата за патување се укинати, туризмот „се врати со одмазда“. Имено, Шпанија минатата година примила рекордни 85,1 милиони странски посетители.

Како одговор, неколку градови презедоа мерки за да се обидат да ја ограничат пренаселеноста.

Северниот крајбрежен град Сан Себастијан минатиот месец ја ограничи големината на туристичките групи во центарот на 25 луѓе и ја забрани употребата на звучници за време на тури со водич.

Јужниот град Севиља размислува да наплаќа од нерезиденти за влез во неговата знаменитост Плаза де Еспања. Барселона ја отстрани од Google Maps автобуската линија популарна кај туристите за да се обиде да направи повеќе простор за локалното население.

Министерката за домување и урбанизам Изабел Родригез изјави дека „неопходно е да се преземат мерки за ограничување на бројот на туристички апартмани“.

Таа, сепак, нагласи дека нејзината левичарска влада е „свесна за важноста на туристичкиот сектор“, кој сочинува 12,8 отсто од бруто домашниот производ на Шпанија.