Израелскиот премиер Бенјамин Нетанјаху во понеделникот изјави дека „не е подготвен да ја запре тековната војна во Појасот Газа“, тврдејќи дека изјавите на претседателот Џо Бајден за предлогот за прекин на огнот се „лажни.
„Не сум подготвен да ја прекинам војната“, ја цитираше јавната телевизија КАН изјавата на Нетанјаху за време на тајното сослушување во Комитетот за надворешни работи и одбрана на Кнесетот.
Тој тврди дека деталите за предлогот за прекин на огнот што го предложи Бајден се „неточни“.
„Нацртот што го претстави Бајден е делумен. Војната ќе биде прекината за да се вратат заложниците и потоа ќе разговараме“, рече израелскиот премиер и додаде: „Има и други необјавени детали. Би можеле да ја прекинеме борбата на 42 дена за да го олесниме враќањето на заложниците, но нема да се откажеме од нашата цел за целосна победа“.
Израелскиот премиер одби да разговара за бројот на палестински затвореници кои ќе бидат ослободени како дел од предложениот договор за размена на заложници.
„Нема да се согласиме да ја завршиме војната без да ги постигнеме целите“, рече Нетанјаху и додаде: „Бројот на заложниците што ќе бидат ослободени во првата фаза од договорот сѐ уште не е утврден“.
Бајден во петокот рече дека Израел претставил трифазен договор за ставање крај на конфликтот во Газа и за ослободување на заложниците кои се држат во енклавата.
Бајден ја повика палестинската група на отпорот Хамас да го прифати предлогот и го повика Нетанјаху да се спротивстави на притисокот од членовите на неговата владејачка коалиција да го отфрлат планот.
Сепак, канцеларијата на Нетанјаху во петокот повтори дека владата има намера да продолжи со својата смртоносна офанзива врз Газа додека не се исполнат сите воени „цели“ на Тел Авив.
Хамас, од своја страна, соопшти дека „ќе одговори позитивно на секој предлог што вклучува траен прекин на огнот, целосно повлекување од Појасот Газа, напори за обнова, враќање на раселените и склучување на сеопфатен договор за размена на заложници“.
Израел ја продолжува својата брутална офанзива врз Газа по нападот на Хамас на 7 октомври и покрај резолуцијата на Советот за безбедност на ОН со која се бара итен прекин на огнот.
Оттогаш, повеќе од 36.400 Палестинци се убиени во Газа, огромно мнозинство жени и деца, а повеќе од 82.600 се повредени, според локалните здравствени власти.
