Од 7.000 до 11.000 палестински пациенти имаат потреба за итна медицинска евакуација, изјави денеска во Женева Ханан Балхи, регионална директорка на Светската здравствена организација за Источен Медитеран.

Балхи рече дека оние пациенти на кои им е потребна евакуација се бара да добијат третман во специјализирани болници.

Таа, исто така, ги посочи ефектите врз Египет, Либан и Сирија како непосредни соседи на окупираната палестинска територија.

„Ако зборувате да не оставиме никого зад себе, ние веќе оставаме значителен број зад себе од Газа, но исто така, кога има притисок врз веќе кревките здравствени системи во соседните земји. Значи, имаме многу работа пред нас. Ако немаме мир, тоа ќе биде исклучително предизвикувачка ситуација“, рече таа.

Минатата недела СЗО соопшти дека сите медицински евакуации во Газа се нагло стопирани од 7 мај.

Израел ја продолжи својата брутална офанзива врз Газа по упадот на Хамас на 7 октомври, и покрај резолуцијата на Советот за безбедност на ОН со која се бара итен прекин на огнот.

Оттогаш, повеќе од 36.500 Палестинци се убиени во Газа, главно жени и деца, а речиси 83.000 други се повредени, според локалните здравствени власти.

Речиси осум месеци од почетокот на израелските напади, огромни делови од Газа се во урнатини и со блокада на храна, чиста вода и лекови.

Израел е обвинет за геноцид пред Меѓународниот суд на правдата, кој во својата последна пресуда му нареди на Тел Авив веднаш да ја прекине својата операција во Рафах, каде што повеќе од милион Палестинци побараа засолниште од војната.