Јужнокорејската армија истрелала серија предупредувачки истрели кон 20 севернокорејски војници кои најверојатно по грешка ја нарушиле меѓукорејската граница, соопшти денеска Генералштабот во Сеул.

Како што е наведено, околу 12.30 часот по локално време, околу 20 севернокорејски војници накратко ја преминале демаркационата линија во демилитаризираната зона во централниот дел на границата, а потоа се вратиле на севернокорејската страна по предупредувањето од јужнокорејската војска која упатила предупредувачки пораки и испукала серија на истрели.

Војската на Јужна Кореја смета дека севернокорејските војници извршувале мисија во демилитаризираната зона и дека „ненамерно“ ја преминале границата.

Портпаролот на јужнокорејската војска Ли Сунг-јунг изјави дека севернокорејските војници веднаш се вратиле на своја страна по предупредувачките истрели и дека Сеул верува дека немале намера да нападнат јужнокорејска територија.

Инцидентот се случи само неколку часа пред Јужна Кореја да продолжи со емитување пропаганда преку звучници на границата против Пјонгјанг за прв пат по шест години, како одговор на кампањата на Северна Кореја да пушта балони за ѓубре преку граница.

Се проценува дека Пјонгјанг испратил повеќе од 1.600 вакви балони од 28 мај како одговор на летоците против Северна Кореја испратени од јужнокорејски активисти.

Демилитаризираната зона меѓу двете Кореи е една од најсилно обезбедуваните области во светот, со бодликава жица и значително воено присуство на двете страни.

Корејa е поделенa од Корејската војна во 1950-тите, која заврши со примирје, а не со прекин на огнот.