Американскиот претседател Џо Бајден го одобри распоредувањето на дополнителен ракетен систем „Патриот“ во Киев поради руско-украинскиот конфликт.

Одлуката беше донесена минатата недела по состаноците на високо ниво и интерните дебати за тоа како да се балансираат потребите на Украина без да се загрози американската борбена готовност, објави „Њујорк тајмс“, цитирајќи неименувани официјални претставници.

Новоодобрениот систем „Патриот“ ќе дојде од Полска, каде што се користи за заштита на американските војници што се подготвуваат да се вратат во САД, изјавија официјални претставници за весникот.

Тие додадоа дека се очекува системот да биде оперативен во Украина во наредните денови.

Системите „Патриот“, познати по своите напредни радари и мобилни фрлачи, спаѓа во најефикасно оружје за противвоздушна одбрана на располагање. Но дефицитарни се.

Пентагон не го објави точниот број на ракетни системи „Патриот“ што ги поседува. Но висок воен претставник откри дека во моментов низ светот се распоредени само 14 системи.

Некои американски сојузници, исто така, пратија „Патриот“ во Украина и се очекува повеќе европски земји да го сторат тоа, а Германија и Холандија веќе ги распоредуваат системите.

Според весникот, министерот за надворешни работи на Украина, Дмитро Кулеба, минатиот месец ја истакнал итната потреба од повеќе системи „Патриот“ за одбрана на клучните региони, како Харков и Одеса, особено во екот на руските ракетни напади и нападите со беспилотни летала врз клучната инфраструктура.

Овие напади сериозно ја погодија енергетската мрежа на Украина, предизвикувајќи прекини на струја низ целата земја.

Минатата недела челникот на Воениот комитет на НАТО, адмирал Роб Бауер, ја нагласи важноста нациите да ги ризикуваат сопствените одбранбени капацитети за да ѝ помогнат на Украина.

Официјални претставници за весникот изјавија дека додека имало дискусија на највисоко ниво за давање друг систем „Патриот“ на Украина, генералот Чарлс К. Браун Џуниор и секретарот за одбрана Лојд Остин разговарале кој „Патриот“ да се прати.

Официјалните претставници додадоа дека се одлучиле за батерија од Полска, поради близината до Украина.

Според весникот, се очекува ова да биде главна тема на разговорите на претстојните состаноци за одбрана на НАТО и сојузниците во Белгија, на кои ќе се разговара за дополнителни стратегии за поддршка на Украина.

Системот „Патриот“ е најскапо оружје што САД ѝ го обезбедиле на Украина, чини околу 1,1 милијарда долари, што вклучува 400 милиони долари за системот и 690 милиони долари за проектилите.