Американскиот претставник во Тел Авив го информирал израелскиот премиер Бенјамин Нетанјаху за претстојното пристигнување на американско оружје и муниција, соопштија од канцеларијата на Нетанјаху во средата.
„Американскиот амбасадор во Израел, Џек Лу, вчера му кажа на премиерот Нетанјаху дека муницијата и оружјето за кои зборуваше премиерот се во процес на доставување до Израел“, се вели во соопштението.
„Премиерот Нетанјаху рече дека очекува тоа да се случи и им наложи на израелските тимови да работат со нивните американски колеги за таа цел“.
Нетанјаху во вторникот го критикуваше Вашингтон за претходното задржување на оружје и муниција од Израел. „Незамисливо е дека во изминатите неколку месеци, американската администрација го задржува оружјето и муницијата за Израел“, му кажа Нетанјаху на американскиот државен секретар Антони Блинкен за време на неговата неодамнешна посета на Тел Авив. Белата куќа одговори со откажување на стратешкиот состанок со Израел кој беше закажан за четврток, според израелскиот весник Харец. Според американски и израелски извори, од почетокот на војната во Газа на 7 октомври, САД му обезбедиле на Израел значителни количини оружје и муниција. Американскиот претседател Џо Бајден претходно го суспендираше ограничениот договор за оружје со Израел, наведувајќи ја загриженоста за заштитата на цивилите. На почетокот на овој месец, Израел потпиша договор од 3 милијарди долари за купување на 25 борбени авиони Ф-35 од американско производство, се вели во соопштението на израелското Министерство за одбрана, пренесено од Харец. Во април Бајден потпиша пакет помош од 26,4 милијарди долари за Израел, кој вклучуваше воена помош од 14 милијарди долари. Непочитувајќи ја резолуцијата на Советот за безбедност на ОН со која се бара итен прекин на огнот, Израел се соочи со меѓународна осуда поради неговата континуирана брутална офанзива против Газа по нападот на Хамас на 7 октомври. Оттогаш во Газа се убиени речиси 37.400 Палестинци, повеќето жени и деца, а повеќе од 85.400 други се повредени, според локалните здравствени власти. Израел е обвинет за геноцид пред Меѓународниот суд на правдата, чија последна пресуда му нареди на Тел Авив веднаш да ја прекине својата операција во Рафах, каде што повеќе од 1 милион Палестинци побараа засолниште од војната пред да биде нападната на 6 мај.
