Поголемиот дел на Босна и Херцеговина, Црна Гора, подрачјето Далмација во Хрватска, како и делови на Албанија денес околу пладне останаа без напојување со електрична енергија. Речиси целото подрачје на Црна Гора е без струја, објави Црногорскиот електродистрибутивниот систем (ЦЕДИС).
„Поради прекини на мрежата на црногорскиот електродистрибутивен систем, црногорскиот електропреносен систем, речиси целата област на Црна Гора е без струја“, наведоа.
Електростопанството на Босна и Херцеговина соопшти дека на 21 јуни 2024 година во 12 часот и 25 минути дошло до тотален колапс на електроенергетскиот систем во Босна и Херцеговина и дека се работи на обнова на системот.
Иако се уште не се познати точните причини за дефектот на системот, се претпоставува дека причината за преоптоварувањето на меѓусебните 400 kV далноводи во регионот, нивните прекини и преносот на нарушувања во системот на БиХ.
„Во тек се активности за обновување на системот, пренос на напон до хидроцентрали и термоелектрани и координирани активности со системскиот оператор (НОС БиХ) за вклучување на високонапонски мрежни објекти во БиХ и нивно поврзување со соседните системи“, наведено е од Електростопанство на БиХ. Прекинот во снабдувањето со електричната енергија во деловите на Република Хрватска предизвика меѓународно пореметување кое зафати повеќе земји.
Хрватскиот преносен систем оператор врши анализа со системските оператори на соседните земји за да се утврди причината, соопшти Хрватската електроиндустрија (ХЕП), а пренесуваат медиумите во Хрватска.
„За ублажување на проблемот со меѓународниот прекин на снабдувањето со електрична енергија, „Хрватска електропривреда“ ги стави во целосна функција сите свои производствени капацитети за да може ХОПС (хрватскиот преносен систем оператор) да обезбеди снабдување со електрична енергија на граѓаните на Република Хрватска во најкус можен рок." Што се однесува до дистрибутивната мрежа на ХЕП, се наведува дека на мрежата нема оштетувања. Прекинот во напојувањето со електричната енергија предизвика гужви во сообраќајот во сите поголеми градови.
