Делегација на македонската Влада предводена од премиерот Христијан Мицкоски ќе биде дел од одбележувањето на 75 години од НАТО.

„Голем поздрав од Вашингтон. Следниве неколку дена во Вашингтон и во Њујорк ќе престојува владина делегација која што ќе ја предводам јас, а во нејзин составен дел се и министрите за надворешни работи, внатрешни работи и одбрана. Ќе бидеме дел од настанот кој што ќе прославува 75 години од постоењето на НАТО алијансата“, истакна премиерот Мицкоски во видео обраќање коешто го објави Владата.

Тој потенцираше дека а ќе има голем број билатерални средби кои што ќе ги има заедно со државниците на земји кои што се членки на НАТО алијансата, во деновите кои што следат. Исто така, Мицкоски додаде дека во деновите кои следат ќе има средби со „бизнис заедницата во САД, каде што ќе ги презентира потенцијалите кои што ги нуди Македонија за инвестирање.“

„Ќе најавам уште една нова странска инвестиција на компанија која што е дел од листата на најголемите 500-тини компании овде во САД, нови десетици милиони евра инвестиција и нови работни места за македонските граѓани. Тоа е она кое што преставува основен приоритет на новата влада во Македонија. Би сакал исто така да напоменам дека последните денови во Њујорк ќе ги искористам за средба со македонската дијаспора, македонските исселеници. Би сакал од нив да слушнам што е она што тие го очекуваат од новата влада и нормално, што е она што новата влада ќе го понуди за да можат нашите исселеници да се вратат дома, во нивната татковина, таму да инвестираат и практично да ги избегнат сите оние пречки кои што беа изминатиот период со кои тие се соочуваа при своето доаѓање назад во својата татковина“, рече Мицкоски.

„Уште еднаш да се заблагодарам на македонската јавност што не следи изминатиот период и да ја охрабрам дека доаѓаат нови убави моменти за македонските граѓани. Ние на најдостоинствен начин, како што ни прилега, ќе ги претставуваме интересите на граѓаните и државата овде во Вашингтон , а потоа и во Њујорк“, нагласи Мицкоски.