Либанското движење Хезболах во средата потврди дека истакнатиот командант Фуад Шукр бил убиен вo вторникот во воздушен напад во Бејрут.

Хезболах претходно соопшти дека Шукр бил во зградата за време на воздушниот напад, но не можеа да ја потврдат смртта пред да се провери под урнатините.

Во нападот загинаа најмалку четири лица, а 80 се повредени. Израелската армија потврди дека во вторникот вечерта извршила напад во јужните предградија на Бејрут.

Израел тврди дека Шукр бил мозокот на саботниот ракетен напад врз Мајдал Шамс, во окупираната Голанска Висорамнина, во кој загинаа 12 лица.

Хезболах негираше каква било одговорност за смртоносниот напад.