ЕУ изразува жалење за одлуката на грузискиот премиер Иракли Кобахидзе и партијата Грузиски сон Владата да ги прекине преговорите за пристапување во Унијата и отфрлање на финансиската поддршка до 2028 година, се вели во заедничката изјава на високиот претставник за надворешни работи и безбедност Каја Калас и комесарот за проширување Марта Кос.

„Забележуваме дека оваа објава означува отстапување од политиката на сите претходни грузиски влади и европските аспирации на огромното мнозинство на грузискиот народ, како што е содржано во Уставот на Грузија“, се наведува во соопштението објавено на веб-страницата на ЕУ.

Во соопштението се потсетува дека активностите на грузиските власти и демократското назадување доведоа до де факто запирање на процесот на пристапување веќе во јуни годинава и дека финансиската помош од ЕУ, која директно им користи на грузиските власти, во моментов е во мирување.

Од ЕУ истакнуваат е дека грузискиот народ повторно излезе на улиците за да ги потврди своите аспирации за влез во Европската унија.

„ЕУ силно го осудува насилството врз мирните демонстранти, кои силно ја поддржуваат нивната европска и демократска иднина. Овие постапки на грузиската влада имаат директни последици за нашите односи“, се вели во соопштението, додавајќи дека грузиските власти мора да го почитуваат правото на слобода на собирање и изразување и воздржување од употреба на сила против мирни демонстранти, политичари и претставници на медиумите.

„Сите акти на насилство мора да бидат истражени и одговорните мора да одговараат, се вели во соопштението, изразувајќи загриженост поради „континуираниот демократски пад на земјата, вклучително и нерегуларностите што се случија пред и за време на неодамнешните парламентарни избори“.

Се истакнува и дека ЕУ стои до грузискиот народ и неговиот избор за европската иднина.

„Вратата на ЕУ останува отворена, а враќањето на Грузија кон европските вредности и патот кон пристапување во ЕУ е во рацете на грузиското раководство“, се вели во соопштението.