Кина силно го осудува и решително го отфрла барањето на Литванија кинескиот дипломатски персонал да ја напушти таа земја во одреден рок, изјави денеска портпаролот на кинеското Министерство за надворешни работи.

Портпаролот рече дека на 29 ноември Министерството за надворешни работи на Литванија без никаква причина го прогласи дипломатскиот персонал на кинескиот вршител на должност во Литванија „персона нон грата“ и побара да ја напуштат земјата, наведувајќи дека Пекинг категорично го отфрла ова.

„Несовесен и провокативен потег“, соопшти портпаролот.

Тој посочи дека Кина го задржува правото да преземе контрамерки против Литванија.

„Кина ја повикува Литванија веднаш да престане да го поткопува суверенитетот и територијалниот интегритет на Кина и да престане да создава тешкотии во билатералните односи“, рече портпаролот.

Тој истакна дека Литванија сериозно го прекршува принципот на една Кина кога станува збор за кинескиот регион Тајван, како и политичките обврски што ги презема во врска со воспоставувањето на кинеско-литванските дипломатски односи.

„Се надеваме дека новата влада на Литванија ќе го следи преовладувачкиот меѓународен консензус, ќе го почитува принципот на една Кина и ќе ги охрабри условите за нормализација на односите со Кина“, рече портпаролот.

Литванија одлучи да протера тројца членови на кинеската дипломатска мисија поради кршење на меѓународните правила.

Литванското Министерство за надворешни работи соопшти дека дипломатите ја прекршиле Виенската конвенција, која ги дефинира правилата за дипломатски односи, како и законите на Литванија, но деталите не се откриени.

На кинеските дипломати им беше наредено да ја напуштат Литванија во рок од седум дена.

Кина го намали нивото на дипломатски односи со Литванија уште во 2021 година, откако таа земја му дозволи на кинескиот регион Тајван да отвори амбасада во Вилнус.