Ахмад Тиби, арапски пратеник во израелскиот Кнесет и лидер на претежно арапската парламентарна група Заедничка листа, изјави дека групата подава рака кон „блокот за промени“, со цел да се собори Владата на Бенјамин Нетанјаху.

„Блокот за промени“ е опозициски сојуз чија цел е да ја замени Владата на премиерот Нетанјаху. Во него се вклучени партијата Јашар на поранешниот началник на Генералштабот Гади Ајзенкот, партијата Јеш Атид на Јаир Лапид, Демократите на Јаир Голан, Бејахад на Нафтали Бенет и Израел Бејтену на Авигдор Либерман.

„Масовната излезност на арапските граѓани е историски успех за Заедничката листа, која одговори на повикот на јавноста за единство и докажа дека е одлучувачка сила без која промената е невозможна“, рече Тиби во писмената изјава доставена до Анадолу.

„Ја подаваме раката кон ‘блокот за промени’ за да ги собориме Владата на Нетанјаху и Бен-Гвир, процес што ќе започне со отстранувањето на претседателот на Кнесетот, Амир Охана“, додаде тој.

Според видеоснимката објавена од неговиот кабинет, Тиби во раните утрински часови денес, на собир на поддржувачите на Заедничката листа во градот Тајибе, во централниот дел на Израел, изјави дека нивните гласови биле „најгласни“ и покрај обидите да се „исклучи електричната енергија на избирачките места и да се попречи гласањето“.

„Бен Гвир, криминалецот, нема да биде министер за полиција. Неговиот ден дојде“, додаде тој.

Според проекциите на израелските медиуми, блокот на Нетанјаху требало да освои 54 места во Кнесетот со 120 пратеници, седум помалку од потребното за парламентарно мнозинство, при преброени 84,5 отсто од гласовите на парламентарните избори во Израел.

Опозицискиот блок предводен од Ајзенкот требало да освои 49 места, додека претежно арапските партии се очекувало да добијат 17 места, објави весникот „Тајмс оф Израел“, повикувајќи се на Централната изборна комисија.

Се очекувало претежно арапската Заедничка листа да освои 11 места, а Обединетата арапска листа (Раам) требало да добие шест места.

Извор: АА