Дуелите од првото коло од групната фаза на Лигата на шампионите на УЕФА донесоа пресврти, драма и спектакуларни голови. Реал Мадрид успеа да го победи Марсеј со еден играч помалку, додека Јувентус и Борусија го одиграа најефикасниот натпревар кој заврши со резултат 4:4

Не недостасуваше возбуда на Сантијаго Бернабеу. Марсеј го шокираше домашниот тим во 22. минута со голот на Тимоти Веа за водство од 1:0, но Килијан Мбапе постигна гол од пенал шест минути подоцна за резултат 1:1.

Драмата следеше во 72. минута кога Дани Карвахал заработи директен црвен картон за неспортски удар со глава врз голманот Рули, а судијата од БиХ Ирфан Пељто го исклучи по прегледот на ВАР.

Иако со еден играч помалку, Реал успеа да победи. Во 82., Мбапе по сомнително досуден пенал повторно постигна гол и им донесе три бода на домашните.

Вистински голијада имаше во Торино во дуелот помеѓу Јувентус и Борусија, со осум гола во второто полувреме, кога домаќините постигнаа два гола во судиското продолжение и стигнаа до 4:4.

Карим Адејеми ги доведе гостите во водство во 52. минута, но Кенан Јилдиз го израмни резултатот со одличен удар во 63. минута. Само две минути подоцна, Феликс Нмеча ја врати предноста на Борусија, но Душан Влаховиќ го израмни резултатот на 2:2 во 67. минута.

Кога прво Јан Куто во 76. минута реализираше за Германците, па Рами Бенсебаини даде гол од пенал во 86. минута за водство на Борусија од 4:2, се чинеше дека сè е завршено, но Јуве не се предаде.

Влаховиќ го намали резултатот на 4:3 во 94. минута, а потоа му асистираше на Кели кој го израмни резултатот на 4:4 во 96. минута за неверојатен исход на средбата во Торино.

Тотенхем победи со 1:0 против Виљареал со автогол на Луиз.

Карабаг креираше сензација во Лисабон и откако губеше со 2:0 победи со 2:3 во против Бенфика.

Арсенал на најдобар начин го стартуваше новото издание во ЛШ откако славеше 0:2 на гости против Атлетик Билбао. Англискиот тим покажа квалитет и најави дека оваа сезона е еден од фаворитите за титулата и во елитното европско клупско натпреварување.

„Резервистите“ на Микел Артета му донесоа триумф на Арсенал. Габриел Мартинели го постигна водечкиот гол, по асистенција на Тросар, кога во 72. минута ја претрча одбраната на домашниот тим и го совлада Унаи Симон.

Во 87. минута, Мартинели му возврати на Тросар со асистенција, а Белгиецот беше стрелец на вториот гол за Топчиите.

Во Ајндховен, ПСВ загуби од Унион Сен Жил со 1:3. Давид Промис од пенал беше стрелец на првиот гол во ЛШ оваа сезона, откако погоди во деветтата минута, а Ануар Аит Ел Хаџ во 39. минута зголеми на 0:2 за Белгијците.

Кевин Мекалистер во 81. минута со трет гол за гостите го реши победникот, а Рубен ван Бомел го постигна почесниот погодок за ПСВ во 90. минута.

Уште пет натпревари од Лигата на шампионите ќе се играат вечерва.

Славија Прага го пречекува Бодо Глимт, а првото дерби на вечерта е во Минхен, каде Баерн ќе го пречека Челзи.

Ливерпул и Атлетико Мадрид е второто дерби, а ПСЖ ќе ја започне одбраната на трофејот на домашен терен против Аталанта.

Во последниот натпревар ќе се сретнат Ајакс и Интер.