Јапонската премиерка Санае Такаичи денес објави дека ќе го распушти Претставничкиот дом и ќе распише предвремени парламентарни избори, кои ќе се одржат на 8 февруари, додека официјалната изборна кампања ќе започне на 27 јануари.
На прес-конференција, Такаичи изјави дека ќе го „стави својот мандат на коцка“ и ќе побара од гласачите да одлучат дали треба да остане премиер на Јапонија откако го распушти Долниот дом на парламентот на првиот ден од овогодишната редовна седница на Собранието.
Таа, исто така, изјави дека ќе се стреми да го освои мнозинството за владејачкиот блок на изборите.
Изборите ќе бидат први откако Такаичи стана првата жена премиер на Јапонија на 21 октомври, и први откако еден ден претходно беше потпишан коалицискиот договор меѓу нејзината Либерално-демократска партија и Јапонската партија за иновации.
Такаичи nа изборите ќе се обиде да ја искористи високата јавна поддршка за својот кабинет за да побара мандат од граѓаните за она што таа го опишува како нејзина „одговорна, но решителна“ фискална политика, како и нова рамка за владејачката коалиција.
Предвремените избори ќе се одржат помалку од година и пол по претходните избори за Долниот дом на парламентот, кои се одржаа во октомври 2024 година.
Според јапонскиот Устав, членовите на Долниот дом имаат четиригодишен мандат, освен ако парламентот не се распушти.
Минатата недела, Такаичи им претстави план на врвните функционери на владејачката партија за распуштање на Долниот дом на парламентот во рана фаза по 150-дневната редовна седница на националниот парламент што започнува следниот петок.
Владата на Санае Такаичи се соочува со тешкотии во парламентарното управување, бидејќи блокот предводен од Либерално-демократската партија (ЛДП) има тесно мнозинство во Долниот дом, додека останува малцинство во Домот на советниците, принудувајќи ја да соработува со опозициските партии за донесување закони.
Опозициските партии го критикуваа планот на Такаичи за распишување предвремени избори, велејќи дека таа ги става политичките интереси пред парламентарното одобрување на почетниот буџет за фискалната 2026 година, која започнува во април, и покрај нејзиното ветување дека ќе даде приоритет на спроведувањето на политиките.
Таа во октомври минатата година беше избрана за 104-ти премиер на земјата.
