Државниот секретар на САД, Марко Рубио, изјави дека Вашингтон ќе му обезбеди „непоколеблива поддршка“ на Израел во војната во Газа, повикувајќи на искоренување на Хамас за време на посетата на сојузникот на САД.

Рубио го критикуваше Хамас за неговото, како што рече „неспоредливо варварство“ и додаде дека народот на Газа не може да има мир или подобра иднина сè додека Хамас не биде разоружан и сите заложници не бидат вратени дома.

„Народот на Газа заслужува подобра иднина, но таа подобра иднина не може да започне сè додека Хамас не биде елиминиран. Можете да сметате на нашата непоколеблива поддршка и посветеност за да ја видите реализацијата“, изјави Рубио пред новинарите покрај премиерот Бенјамин Нетанјаху.

Рубио рече дека плановите на западните земји да признаат палестинска држава „го охрабриле“ Хамас.

Рубио нагласи дека Иран им се заканува не само на Израел и САД, туку и на сојузниците во Персискиот Залив и Европа.

Тој рече дека нуклеарниот Иран е „неприфатлив ризик“ за светот.

Обраќајќи се на прес-конференцијата Рубио рече дека Вашингтон е во постојан контакт со своите сојузници од Персискиот Залив и сè уште смета на улогата на Катар во постигнувањето договор за прекин на огнот во Газа и размена на заложници меѓу Израел и Хамас.

„САД ќе продолжат да го охрабруваат Катар да игра конструктивна посредничка улога во напорите за постигнување договор за Газа. Вашингтон останува фокусиран на „што се случува сега“ во конфликтот, рече тој, нагласувајќи дека Катар би можел да помогне во посредувањето за исход што оди подалеку од прекинувањето на непријателствата.

Нетанјаху рече дека посетата на Рубио е „јасна порака“ дека САД се со Израел и го пофали претседателот Доналд Трамп за неговата поддршка, нарекувајќи го „најголемиот пријател што Израел некогаш го имал“.