Израелските напади во Либан од 2 март раселиле речиси 100.000 луѓе, при што загинале повеќе од 100, а 638 се ранети, според извештајот на Одделот за управување со катастрофи на либанската влада.

Во извештајот се наведува дека вкупниот број на раселени лица во колективни засолништа достигнал 95.773, додека вкупниот број на раселени семејства достигнал 21.475, објави државната новинска агенција ННА.

„Бројот на жртви на израелската агресија од зората во понеделник, 2 март, до попладнето во четврток, 5 март, се зголемил на 102 убиени и 638 ранети лица“, се наведува во извештајот.

Бројот на засолништа отворени за прием на раселени лица достигнал 441 во различни либански региони, се вели во извештајот.

Според најновото соопштение од Центарот за итни операции за јавно здравје на Министерството за здравство, „израелски непријателски напад насочен кон куќа во градот Машгара во западниот дел на Бека резултираше со смрт на четири цивили, вклучувајќи петгодишно девојче и седумгодишно момче, и повреда на еден цивил“.

Израелскaта армија, пак, денеска соопшти во текот на ноќта погодиле десет повеќекатни згради во јужните предградија на Бејрут што ги користел Хезболах .

Меѓу погодените цели наводно биле седиштето на извршниот совет на Хезболах и магацин за беспилотни летала, објави „Тајмс оф Израел“.

Пред нападите, израелската војска издаде предупредувања за евакуација за четири главни населби во областа Дахија, упориште на Хезболах.

Израелскиот министер за финансии, Безалел Смотрич, се закани со масовно уништување во четврток, споредувајќи ги предградијата на Бејрут со Кан Јунис во Газа, кој беше речиси целосно уништен за време на израелските напади врз палестинските територии.

Светските лидери, вклучувајќи го францускиот претседател Емануел Макрон и шпанскиот премиер Педро Санчез, го повикаа Израел да ги намали тензиите и да спречи ширење на конфликтот на нов фронт во Либан.

Израел вели дека одмаздата е одговор на ракетните напади на Хезболах врз северен Израел во понеделник.