Компанијата за развој на вештачка интелигенција Oпен AИ денес достигна вредност од 500 милијарди долари, според најновата проценка, станувајќи највредниот приватен стартап во светот и престигнувајќи го СпејсX на Елон Маск, претходно проценет на 400 милијарди долари.

Скокот на проценката дојде откако сегашните и поранешните вработени продадоа акции на инвеститори во секундарна понуда вредна 6,6 милијарди долари, објави Блумберг.

Тоа претставува силно зголемување од претходната проценка од 300 милијарди долари претходно оваа година и ја потврдува инвестициската еуфорија околу вештачката интелигенција.

Oпен АИ сè уште работи без профит, но потпишува договори со гиганти како Оракл и инвестира во инфраструктура што би можела да чини билиони долари во наредните години.

Оваа пресвртница доаѓа во време кога Oпен АИ, предводен од Сем Алтман, е во преговори со Мајкрософт за да стане јавна компанија со статус на корпорација од јавен интерес.

Ова е посебна правна форма на бизнис во Соединетите Американски Држави што комбинира профитна ориентација со општествено корисна мисија, така што покрај остварувањето профит, мора законски да работи и во корист на заедницата или јавното добро.

Доколку се постигне оваа трансформација, Oпен AИ формално ќе го напушти својот непрофитен модел врз кој е основан во 2015 година.