Милијардерот и соосновач на „Мајкрософт“, Бил Гејтс, сведочеше пред американскиот конгресен комитет дека осудениот сексуален престапник Џефри Епстин се обидел да го уценува преку неговите вонбрачни афери.

Сведочејќи зад затворени врати пред Комитетот за надзор на Претставничкиот дом, како дел од истрагата на Министерството за правда на САД за Епстин, Гејтс рече дека Епстин користел информации за неговите вонбрачни врски со тогашната сопруга Мелинда Гејтс за да изврши притисок повторно да се поврзе со него откако, Гејтс рече дека почнал да ги прекинува контактите со Епстин.

Претставник на Гејтс објави копија од неговото подготвено сведочење пред комитетот, во кое тој ги повтори претходните јавни изјави дека жали што имал каква било врска со Епстин, но дека не се вклучил во никакво криминално однесување и никогаш не жртвувал никого.

Контактите на Гејтс со Епстин станаа јавни откако Епстин беше уапсен во 2019 година од страна на федералните власти под обвинение за трговија со луѓе со цел сексуална експлоатација. Неговата поврзаност со Епстин го оштети јавниот углед на Гејтс, придонесе за влошување на неговиот брак, а оваа година ја поттикна неговата добротворна фондација да одобри нов надворешен преглед на врските на Гејтс со осудениот криминалец, кој си го одзеде животот додека чекаше судење.

„Во бизнисот што го работам, репутацијата е основа за развивање партнерства што спасуваат животи. Средбата со Епстин беше сериозна грешка во проценката и ја стави оваа работа во опасност“, рече Гејтс во соопштението.

„Неговото однесување беше спротивно на сите мои напори да придонесам за свет во кој секој има можност да живее здрав и продуктивен живот“, додаде тој.

Гејтс ги започна своите контакти со Епстин во 2011 година, иако осрамотениот финансиер се изјасни за виновен околу три години претходно за секуална злоупотреба на малолетнички и подводување во американската држава Флорида. Договорот за признавање на вина следеше по контроверзниот договор за негонење со федералната влада, со кој заврши истрагата за наводите дека Епстин рутински сексуално злоставувал десетици малолетнички, некои на возраст од само 14 години.

Гејтс призна дека требало да направи повеќе проверки на биографијата на Епстин пред да се сретне со него во 2011 година.

„Се сеќавам дека бев свесен дека Епстин имал претходни правни проблеми, но не го разбирав целосно обемот на злосторствата што ги сторил. Ја прифатив средбата без да ја направам потребната длабинска анализа што требаше да ја направам“, рече Гејтс.

Гејтс имал неколку состаноци со Епстин до декември 2014 година, велејќи дека тие главно биле за можноста за основање добротворна фондација, која никогаш не се материјализирала. Гејтс рече дека Епстин потоа се обидел да ги искористи вонбрачните афери за да го уценува да ги продолжат разговорите.

„Потоа дознав дека Епстин станал свесен за чувствителни информации за мојот приватен живот, вклучително и фактот дека сум бил неверен во мојот брак“, рече Гејтс.

„Овие афери немаа никаква врска со моите односи со Епстин, но би биле болни за моето семејство“, рече тој.

„Како што јавноста сега може да види од објавените документи, Епстин се обидувал да искористи информации за моите неверства за да ме принуди повторно да се поврзам со него“, продолжи Гејтс.

„Тој не успеа во тој обид, но тоа покажува некои од начините на кои се обидел да ги искористи нашите контакти за да ги оствари своите цели“, додаде тој.

Гејтс му рече на Конгресот дека длабоко жали што имал каков било контакт со Епстин.

„Никогаш не требаше да се сретнам со Епстин. Врз основа на она што го знам сега, разбирам дека дури и да ги испорачаше новите донатори што ги вети, тоа не би го оправдало дружењето со него“, заклучи тој.