Кина и САД се договорија за взаемно намалување на царините за увоз меѓусебно во вредност од околу 30 милијарди долари, при што за околу 90% од опфатените производи ќе важат царинските стапки за „најповолена нација“ (MFN), потврди денес кинеското Министерство за трговија.

Договорот е еден од резултатите на економските и трговските консултации одржани од кинеските и американските тимови во Њујорк и Вашингтон во периодот од 20 до 23 септември, соопшти Министерството (познато како MOFCOM) во понеделникот.

Двете страни ќе го спроведат намалувањето на царините истовремено, откако ќе ги завршат процедурите предвидени со нивните соодветни домашни закони, се наведува во соопштението.

Кина и САД исто така се договорија да формираат билатерален трговски совет во рамките на нивниот механизам за економски и трговски консултации, чија примарна задача ќе биде олеснување на билатералната трговија.

Царините за извоз на американски јаглен во Кина ќе бидат вклучени во рамката за взаемно намалување на царините во вредност од 30 милијарди долари, што според MOFCOM ќе го олесни кинескиот увоз на американски јаглен во 2027 и 2028 година.

Двете земји исто така се договорија да формираат совет за инвестиции и работна група за земјоделство, со кои заеднички ќе раководат MOFCOM и Канцеларијата на американскиот трговски претставник. Се очекува работната група за земјоделство да го одржи својот прв состанок пред крајот на 2026 година.

Министерството соопшти дека двете страни постигнале и начелен договор за финансиските услуги и воспоставиле дијалог за вештачка интелигенција, предводен од кинескиот вицепремиер Хе Лифенг и американскиот министер за финансии Скот Бесент.

Следниот дијалог за вештачка интелигенција се очекува пред крајот на ноември, а двете страни се договорија и да воспостават канал за комуникација за инциденти поврзани со вештачката интелигенција.