Советот за лидерство на Иран го избра Моџтаба Хамнеи, синот на убиениот ајатолах Али Хамнеи, за нов ајатолах и врховен водач на Иран, објави Иран Интернешнл.

Како што наведува порталoт, Моџтаба Хамнеи е избран на инсистирање на Корпусот на иранската револуционерна гарда (ИРГЦ).

Според информациите добиени од тој портал, Иранското собрание на експерти, под притисок од ИРГЦ, го избра Моџтаба Хамнеи за нов врховен водач.

Таа одлука сè уште не е официјално објавена и се очекува да биде објавена откако ќе биде погребан Али Хамнеи, забележува иранскиот портал.

Тој додава дека ова не е рутинско наследство, туку воена одлука од безбедносни причини и дека покренува сериозни прашања за уставната постапка.

Како што истакнува порталот, на ИРГЦ сега ѝ се потребни две работи истовремено - контрола и легитимитет.

По атентатот врз Хамнеи, иранските власти го формираа Советот за лидерство, чија цел беше привремено да ги преземе должностите на ајатолахот и да го избере неговиот наследник.

Секретарот на Врховниот совет за национална безбедност на Иран, Али Лариџани, изјави дека атентатот врз Хамнеи е „многу горчлив инцидент“ за целата иранска нација и дека срцето на иранската нација е „изгорено“ од оваа акција.

Али Хамнеи, кој беше лидер на Иран 37 години, беше убиен во израелски воздушен напад врз Техеран во саботата.

Израелскиот министер за одбрана Израел Кац денес изјави дека секој лидер што иранскиот режим ќе го назначи да го замени убиениот ајатолах Али Хамнеи ќе биде „недвосмислена цел за елиминација“.

„Секој лидер назначен од иранскиот режим да води план за уништување на Израел, закана за Соединетите Американски Држави, слободниот свет и земјите од регионот и угнетување на иранскиот народ ќе биде недвосмислена цел за елиминација“, рече Кац.

Тој додаде дека „не е важно како се вика или каде се крие“ наследникот и рече дека Израел, заедно со американските партнери, ќе продолжи да дејствува „со полна сила“ со цел „да ги демонтира капацитетите на режимот и да создаде услови иранскиот народ да го собори и замени тој режим“.

Соединетите Американски Држави и Израел го нападнаа Иран во саботата наутро во она што го нарекоа „превентивни напади“ по неуспехот на повеќе рунди преговори за нуклеарната програма на Иран.

Потоа Иран започна масовни одмазднички напади врз Израел и цели поврзани со САД низ регионот на Блискиот Исток.