Поранешниот прв вицепремиер на Република Северна Македонија и министер за односи меѓу заедниците Артан Груби утрово е приведен на граничниот премин Блаце, информира Министерството за внатрешни работи (МВР).

„Денеска (23.2.2026) во 6:10 часот на Граничниот премин Блаце, на влез во државата, од слобода е лишен Артан Груби (48), кој беше баран со меѓународна потерница за истрага за сторено кривично дело по чл.354 ст.5 в.в. ст.3 в.в ст.1 в.в со чл.22. од КЗ“, соопшти Министерството за внатрешни работи.

Во декември 2024 година, Груби ставен на „црна листа“ на САД поради, како што се наведува, вмешаност во значителна корупција, односно поради примање поткуп во врска со судските процеси поврзани со ексдиректор на поранешната Управа за безбедност и контраразузнавање (УБК), Сашо Мијалков.

Груби е осомничен за проневера во Државна лотарија, каде заедно со Перпарим Бајрами се осомничени за криминал од осум милиони евра преку нарачка на ВЛТ апарати.

На 15 декември минатата година, Груби ја напушти земјава преку граничниот премин Долно Блаце.

Три дена потоа, односно на 18 декември, Министерството за внатрешни работи распиша меѓународни потерници по Артан Груби и Перпарим Бајрам, осомничени за проневера во истрагата за Државна лотарија. Потерницата е објавена откако на 17 декември 2025 година Основното јавно обвинителство Скопје достави наредба до МВР за објава на национална потерница и изјава за распишување меѓународна потерница за Груби и Бајрами. Претходно, Основниот кривичен суд Скопје им одреди притвор од 30 дена на двајцата осомничени.