Американскиот производител на чипови Нвидиа и неговиот извршен директор Јенсен Хуанг се соочуваат со групна тужба од акционери, во која се тврди дека ги заведувале инвеститорите со тоа што не ја откриле наводната врска на Хуанг со поранешна извршна директорка на Мегаспид (Megaspeed), според судските документи поднесени во понеделник.
Правната постапка следува по соопштението на одборот на директори на Нвидиа во неделата дека почнале независна истрага за Хуанг по извештаите дека бил цел на странски разузнавачки операции.
Тужбата, поднесена до Окружниот суд на САД за Северниот округ на Калифорнија, ги обвинува Нвидиа и Хуанг за кршење на одредбите од Законот за берза на хартии од вредност од 1934 година.
Поднесена од акционерот Марк Кистенмахер и застапувана од адвокатската канцеларија Розен, предложената колективна тужба ги опфаќа инвеститорите кои купиле или на друг начин стекнале хартии од вредност на Нвидиа помеѓу 9 октомври 2025 година и 8 ноември 2026 година.
Во поднесокот се тврди дека изјавите на Нвидиа дека ревизијата не пронашла докази за пренасочување на нејзините чипови на друго место, заедно со описот на Хуанг за зделките на компанијата со сингапурскиот Мегаспид Интернешенал како „нормални“, биле материјално погрешни.
Тужителот тврди дека изјавите не го откриле наводниот личен однос на Хуанг со Алис Хуанг, поранешна извршна директорка на Мегаспид, која е осомнилена дека собирала разузнавачки информации во име на Кина.
Во тужбата се тврди дека Нвидиа и Хуанг сокриле информации за загриженоста за националната безбедност што би можеле да го загрозат угледот на компанијата и идните деловни перспективи.
Тужителот, исто така, тврди дека изјавите и пропустите на обвинетите вештачки ја зголемиле цената на акциите на Нвидиа за време на предложениот период на колективна тужба.
Во судскиот документ се вели дека акциите на Нвидиа паднале за 4,27% во понеделник, затворајќи на 178,67 долари за акција по откритијата. Тужителот бара неодредена компензаторна штета во име на засегнатите инвеститори.
Одборот изразува доверба во Хуанг
Комитет од независни директори, поддржан од надворешен правен советник, ќе ја надгледува истрагата, соопшти Нвидиа. Одборот додаде дека Хуанг ја поддржува ревизијата и се обврзал на соработка.
Компанијата соопшти дека одборот нема причина да верува дека националната безбедност на САД или доверливите информации на Нвидиа се компромитирани, но дека истрагата ќе ги испита сите достапни информации.
Директорите, исто така, изразија доверба во Хуанг и неговиот раководен тим, ветувајќи дополнителни ажурирања по потреба.
Њујорк тајмс и Фајненшл тајмс објавија наводи дека Алис Хуанг работела за кинеската разузнавачка служба. Извештаите привлекоа внимание на личниот однос на шефот на Нвидиа и неговите потенцијални импликации за компанијата.
Кина ги отфрли обвинувањата во понеделник. На брифинг за медиумите во Пекинг, портпаролот на Министерството за надворешни работи, Гуо Џиакун, ги опиша наводите за кинеска шпионажа како неосновани шпекулации.
Истрагата го стави под лупа раководството на централен играч во глобалната индустрија за вештачка интелигенција. Чиповите на Нвидиа се основа на голем дел од компјутерската инфраструктура што се користи за развој и управување со модели на вештачка интелигенција.
