Протокол за соработка меѓу Министерството за култура и туризам на Република Северна Македонија и Меѓународната организација за турска култура (ТУРКСОЈ) беше потпишан на церемонија одржана во Генералниот секретаријат на ТУРКСОЈ.
На церемонијата присуствуваа министерот за култура и туризам на Северна Македонија, Зоран Љутков, генералниот секретар на ТУРКСОЈ, Султан Раев, амбасадорот на Северна Македонија во Анкара, Јован Манасиевски и голем број гости.
Обраќајќи се на церемонијата, министерот Љутков истакна дека пријателските односи меѓу двете земји дополнително се зајакнати преку соработката во областа на културата.
Љутков додаде дека потпишаниот протокол ќе придонесе за подобро меѓусебно запознавање на народите, зачувување на културното наследство и зголемување на интеракцијата меѓу уметниците.
Генералниот секретар на ТУРКСОЈ, Раев, истакна дека потпишаниот меморандум за разбирање е повеќе од документ за соработка меѓу двете институции, оценувајќи го како важен чекор за зајакнување на културното приближување меѓу народите, поддршка на зачувувањето на културното наследство и поттикнување на уметничкото творештво.
Раев нагласи дека Северна Македонија со својата повеќејазична, повеќерелигиска и мултикултурна структура, претставува еден од најсилните примери на културата на соживот на Балканот, додавајќи дека „соживотот на различните идентитети во меѓусебна почит и разбирање е вредно искуство што треба внимателно да се следи не само на регионално туку и на глобално ниво“.
Исто така, тој нагласи дека турската заедница што живее во Северна Македонија, со своето историско и културно наследство, е неразделен дел од Туркискиот свет и служи како мост меѓу различните култури.
Во рамките на протоколот се предвидува развој на заеднички проекти во областа на културата, уметноста, литературата, сценските уметности, музејските и библиотечните активности, како и во областа на културното наследство, организирање програми за размена на уметници и експерти и воспоставување механизми за размена на информации.
