Три лица загинаа, а 12 се повредени во несреќата при падот на хеликоптер на ЕУФОР во местото Горице во близина на Брчко, во североисточна Босна и Херцеговина, потврди во четврток портпаролот на Јавната здравствена установа „Здравствен центар Брчко“ Салих Ибрахимбеговиќ.

Тој истакна дека по пријавата за падот на хеликоптерот во областа Горице, сите достапни медицински екипи се испратени на терен.

„За жал, на лице место е потврдена смртта на три лица, во хеликоптерот имало 15 лица. Дванаесет лица се повредени и префрлени во болница, а едно е во многу критична состојба“, додаде Ибрахимбеговиќ.

ЕУФОР потврди дека италијански хеликоптер ЦХ-47 Чинок (CH-47 Chinook) на ЕУФОР се урнал денес кај Брчко.

„Како резултат на оваа несреќа, неколку лица од персоналот на ЕУФОР трагично ги загубија животите, додека други се здобија со сериозни повреди. Службите за итни случаи се на местото на настанот и работат на ставање на ситуацијата под контрола“, рекоа тие.

ЕУФОР спроведува целосна и темелна истрага за овој инцидент и ќе објави повеќе информации штом ќе станат достапни и во соодветно време.

Со оглед на трагичната природа на оваа несреќа, ЕУФОР ги повикува сите граѓани да избегнуваат ширење дезинформации за овој настан, да се воздржат од шпекулации за националноста и идентитетот на вклучениот персонал на ЕУФОР и да ги следат само официјалните канали на ЕУФОР за проверени информации.

Извор: АА