Нова дигитална платформа наречена Хелп4У (Help4U), развиена од Европол и истражувачкиот центар ЦEНTРИЦ (CENTRIC), е официјално лансирана со цел да им се обезбеди поддршка на децата и младите кои се соочуваат со сексуална злоупотреба или други форми на онлајн насилство.
Платформата, како што е наведено во денешното соопштение за медиумите на Европол, е дизајнирана да биде лесна за користење и лесно достапна, и им нуди на младите луѓе докажани совети, информации за нивните права и можност да се поврзат со експерти кои можат да обезбедат помош.
Достапна е и за родители, наставници и професионалци кои работат со деца, а пораката на платформата е: „секој заслужува да биде безбеден и слушнат“.
Извршната директорка на Европол, Катрин де Бол, изјави дека децата и младите заслужуваат безбедност и поддршка и онлајн и офлајн и дека Хелп4У им обезбедува сигурни информации и пристап до помош „кога им е најпотребна“.
Таа нагласи дека платформата е пример за европска соработка што носи конкретни резултати за жртвите.
Директорот на ЦЕНТРИЦ, професор Бабак Ахгар, оцени дека проектот „ги става безбедноста, приватноста и довербата на младите луѓе во центарот“.
Според него, со комбинирање на дигиталните иновации и искуствата на младите корисници, платформата нуди безбеден и достапен начин за барање помош и за да бидат слушнати.
Особено се нагласува дека жртвите честопати тешко ја наоѓаат вистинската помош поради сложеноста на достапните услуги и емоционалната состојба во која се наоѓаат, поради што, како што е наведено, е клучно да се обезбедат точни и достапни информации во моментот кога првпат ќе ги побараат.
Платформата, исто така, ги поврзува младите луѓе со експерти кои можат да ги слушаат, советуваат и водат кон безбедноста и закрепнувањето.
Проектот беше лансиран во Белгија, Германија, Ирска, Холандија и Словенија, а беше проширен во Бугарија, Администрацијата на кипарските Грци, Хрватска, Грција, Унгарија, Италија, Португалија, Шпанија и Романија, додека се очекува да бидат вклучени и дополнителни земји во 2026 година.
Хелп4У е развиен во соработка со експерти од психологијата, образованието, ИТ секторот и заштитата на податоци, полицијата и академската заедница.
Учесниците во проектот вклучуваат компетентни институции од сите држави во кои е лансирана платформата.
Иницијативата е дел од Европската мултидисциплинарна платформа против криминални закани ЕМПАЦТ (EMPACT), која се занимава со најзначајните закани од организираниот и сериозниот меѓународен криминал во ЕУ и се базира на подобрено разузнавање, стратешко и оперативно вмрежување на националните и европските институции и партнери.
EMПАЦТ работи во четиригодишни циклуси и се фокусира на заедничките приоритети на ЕУ во борбата против криминалот.
