НАТО, стратешко партнерство со САД и полноправно членство во ЕУ. Ова се трите главни стратешки определби на државата кои денеска пред Генералното собрание на Обединетите Нации ги претстави македонскиот премиер Христијан Мицкоски.

„Тоа не се три одвоени политики. Тоа е една геополитичка ориентација, втемелена врз демократијата, колективната безбедност, владеењето на правото и отворената економија. Во време на неизвесност, нашиот одговор не е стратешка двосмисленост. Нашиот одговор е јасност. Но, јасноста во нашите сојузи не значи вртење грб на светот. Напротив. Токму држава што е сигурна во своите демократски и стратешки избори може со поголема самодоверба да разговара и да соработува со земји што имаат поинаква историја, поинакви интереси и поинакви политички погледи,” истакна Мицкоски.

Во говорот пред Генералното собрание на ОН тој се осврна и на идентитетските прашања и прашањата на историјата.

„Ние сме мала земја. Но, одбиваме големината на нашата територија да го одредува размерот на нашата амбиција. Нашата амбиција е да станеме сериозна држава. Држава на која нејзините сојузници можат да ѝ веруваат. Држава во која младите можат да ја планираат својата иднина. Држава што ги почитува различноста и мултикултурниот карактер на своето општество. Држава доволно сигурна во себе за да го брани сопствениот идентитет, без да го негира идентитетот на другите. Држава што ја знае својата историја, но не е заробена во неа. 

Говорејќи за глобалниот поредок Мицкоски рече дека државата нема да избере „стратешка двосмисленост“ во свет во кој повторно се заострува конкуренцијата меѓу големите сили.

„ Светот што се обликува пред нас е свет на поостра конкуренција. Моќта се прераспределува.“ Односите меѓу големите сили, рече тој, сè повеќе ги определуваат трговијата, технологијата, енергетиката, критичните суровини, транспортните правци и дигиталната инфраструктура. Дури и економската меѓузависност веќе почнува да се третира како безбедносно прашање”, порача премиерот пред Генералното собрание на Обединетите нации.