Туркије претстави сеопфатна стратегија за намалување на емисиите во копнениот, воздушниот, поморскиот и железничкиот сообраќај, како и во телекомуникациските мрежи.
Стратегијата, која опфаќа зелени иницијативи и тековни активности, беше презентирана на 31. Конференција на страните за климатски промени на ОН, (КОП31) во Анталија.
Турскиот министер за транспорт и инфраструктура, Абдулкадир Уралоглу, изјави за агенцијата Анадолу дека Анкара активно работи на интегрирање на обновливите извори на енергија, како и на проширување на домашното производство, употребата и глобалниот извоз на одржливо авионско гориво (СAФ).
„Секој има своја улога во климатската сфера, а ние работиме на намалување на емисиите. Вложуваме во многу области, од телекомуникации до еколошки премини, со што овозможуваме движење на дивиот свет и растенијата од едната на другата страна, истовремено штитејќи го екосистемот“, рече тој.
Уралоглу истакна дека целта на Министерството е до 2053 година да ја прошири инфраструктурната мрежа на Туркије, достигнувајќи 28.500 километри железнички пруги и 10.000 километри автопати.
Оваа долгорочна визија, која се протега низ неколку децении, вклучува и проширување на националната авијациска мрежа на повеќе од 60 аеродроми, со капацитет да опслужуваат до 400 милиони патници годишно.
Министерот додаде дека брзиот технолошки развој и трансформација би можеле да ѝ овозможат на Туркије да ги постигне своите цели за 2050 и 2053 година пред предвидениот рок. Тој нагласи дека платформи како КОП31 остануваат клучни за да се осигура дека растот е усогласен со еколошките обврски и заложби.
