Претседателот на Европскиот совет, Антонио Кошта, изјави дека денеска, за време на средбите со претседателот на Србија, Александар Вучиќ, претседателката на Народното собрание, Ана Брнабиќ, и организациите на граѓанското општество, нагласил дека ЕУ останува најважниот партнер на Србија - во трговијата, инвестициите и зајакнувањето на демократските институции.

Тој напиша на социјалната мрежа X дека ЕУ е подготвена да направи повеќе, но дека темпото на напредок зависи од решителноста на Србија.

„Важно е да се продолжи со забрзување на реформите во области како што се владеењето на правото, изборната реформа и слободата на медиумите. Процесот на пристапување не е само задача за владата. Тој бара целосна мобилизација на српското општество. Времето е од суштинско значење. Вратата кон ЕУ останува отворена, но прозорецот за решителна акција е сега“, напиша Кошта, кој објави фотографии од средбите.

По средбата со претседателот Вучиќ, Кошта изјави дека ЕУ не уценува никого и не поставува пречки пред кандидатите, туку дека, како што рече, работи многу отворено со властите во Србија со цел што поскоро да се испорачаат резултатите од реформите.

„Имаме заедничка цел, заеднички интерес, земјите кандидати и ЕУ, да го постигнеме и исполниме овој процес и тоа што е можно поскоро. И затоа мора тесно да соработуваме на многу искрен начин, да решаваме проблеми и да постигнуваме резултати. Процесот на пристапување е процес базиран на заслуги, а сите земји мора да исполнат различни критериуми. И она што го правиме во Србија, како и во Украина и со Молдавија и преостанатите пет кандидати од Западен Балкан, е да одиме чекор по чекор за да постигнеме резултати во ова“, рече Кошта.