Министерот Зукорлиќ во официјална посета на Северна Македонија
Како што е соопштено, централна тема на разговорот со вицепремиерот Сали беше унапредувањето на регионалната соработка, со посебен фокус на зајакнување на институционалните врски и стабилноста во регионот.
Министерот без ресор во Владата на Србија задолжен за помирување, регионална соработка и општествена стабилност, Усаме Зукорлиќ, вчера ја започна својата официјална посета на Република Северна Македонија, на покана на првиот заменик-претседател на Владата на Република Северна Македонија и министер за европски прашања, Беким Сали.
Како што е соопштено, централна тема на разговорот беше унапредувањето на регионалната соработка, со посебен фокус на зајакнување на институционалните врски и стабилноста во регионот.
За време на официјалната посета на Северна Македонија, министерот Зукорлиќ вчера одржа средби со поглаварот на Исламската верска заедница во Северна Македонија, реис-ул-улема Шаќир-еф. Фетаи, и со претседателот на Бошњачкиот национален совет (БНВ) во земјата, Џевад Хот.
Како што соопштија од кабинетот на Зукорлиќ, за време на средбата со реисот Фетау било разговарано за положбата на Исламската верска заедница, нејзината организација и улогата во зачувувањето на верскиот и културниот идентитет на Бошњаците.
„Беше нагласено дека оваа заедница, преку развиена мрежа на џамии и образовни установи, остварува стабилни и конструктивни односи со државните институции и другите верски заедници, придонесувајќи за мултиконфесионалниот карактер на општеството и за вкупната општествена кохезија“, стои во соопштението.
Исто така, министерот Зукорлиќ се состана со делегација на Бошњачкиот демократски сојуз (БДС) во земјата, предводена од претседателот Мунир Колашинац.
Најавени се и посети и разговори со Бошњаците во селото Љубош во близина на Скопје, како и посета на велешко Горно Оризари, при што се предвидени средби со граѓаните.