Најмалку 15 милиони тинејџери на возраст од 13 до 15 години користат е-цигари ширум светот, при што младите луѓе во просек имаат девет пати поголема веројатност да пушат вејпинг од возрасните, соопшти денес Светската здравствена организација (СЗО).

Во својот прв глобален извештај за употребата на е-цигари, СЗО соопшти дека повеќе од 100 милиони луѓе ширум светот сега користат вејпинг, вклучувајќи најмалку 86 милиони возрасни, претежно во земји со висок животен стандард, објави Ројтерс.

Податоците доаѓаат во време кога глобалната употреба на тутун продолжува да се намалува, при што бројот на корисници се намалува од 1,38 милијарди во 2000 година на 1,2 милијарди во 2024 година.

Бидејќи сè построгите регулативи помагаат да се намали употребата на тутун, индустријата се сврте кон алтернативни производи како што се вејповите за да го компензира падот на продажбата.

Тутунските компании тврдат дека ги таргетираат возрасните пушачи за да им помогнат да се откажат и да ги намалат штетите од чадот од тутун.

„Сепак, електронските цигари предизвикуваат нов бран на зависност од никотин“, предупреди Етјен Круг, директор на одделот за промоција и заштита на здравјето на СЗО.