Европската Унија објави нова стратегија насочена кон забрана на таканаречената конверзиона терапија и сузбивање на омразата кон ЛГБТИК+ луѓето, во светлината на сè почестите напади врз членовите на таа заедница.
Според податоците презентирани денес од Европската комисија, околу една четвртина од членовите на ЛГБТИК+ заедницата во ЕУ, вклучувајќи речиси половина од трансродовите лица, биле изложени на некаков вид конверзиона терапија, вклучувајќи физичко и сексуално насилство, вербални напади и понижување, објави бриселскиот „Политико“.
„Овие податоци се шокантни и оваа практика мора да престане“, изјави европскиот комесар за еднаквост, Хаџа Лабиб, на прес-конференција во Брисел, презентирајќи ја новата ЛГБТИК+ стратегија за периодот од 2026 до 2030 година.
Лабиб предупреди дека ЕУ бележи загрижувачки пораст на омразата и дискриминацијата кон ЛГБТИК+ луѓето, велејќи дека „изгледа како да се враќаме наназад“.
Моментално, 14 од 27-те земји-членки на ЕУ имаат национални стратегии за рамноправност на ЛГБТК+ лицата, додека осум земји, Белгија, Администрацијата на кипарските Грци, Франција, Германија, Грција, Малта, Португалија и Шпанија, веќе ја забранија конверзионата терапија.
Новата стратегија на Комисијата, иако не е правно обврзувачка, се фокусира на борбата против говорот на омраза и сајбер-насилството врз ЛГБТК+ лицата, и онлајн и офлајн.
Комисијата, исто така, разгледува усвојување на закон што би ги хармонизирал дефинициите за говор на омраза на ниво на ЕУ.
Во исто време, неколку европски земји спроведуваат мерки што критичарите ги сметаат за насочени против ЛГБТК+ заедницата.
„Комисијата нема да се двоуми да преземе дополнителни чекори, вклучително и покренување тужби, со цел да ги заштити основните права на граѓаните“, нагласи Лахиб, додавајќи дека во моментов се во тек 10 постапки против Унгарија за кршење на основните права на ЕУ.
Поради овие прекршувања, Европската комисија веќе замрзна 18 милијарди евра средства наменети за Унгарија.
„Не сакаме да ги казнуваме граѓаните за постапките на нивните влади“, рече Лахбиб и најави дека во рамките на следниот повеќегодишен буџет на ЕУ, таа ќе предложи замрзнатите средства да бидат насочени директно кон организациите на граѓанското општество кои се борат за човекови права.
